دھرتی ٹی وی گمبٹ کے تعلقہ رپورٹر جیون آرائیں کے بہیمانہ قتل پر ایم کیوایم رابطہ کمیٹی کی مذمت

کراچی۔۔۔5نومبر2014ء

متحدہ قومی موومنٹ کی رابطہ کمیٹی نے دھرتی ٹی وی گمبٹ کے تعلقہ رپورٹر جیون آرائیں کے بہیمانہ قتل کی سخت ترین الفاظ میں مذمت کی ہے اوراس وقعہ پر گہرے دکھ اور افسوس کا اظہار کیا ہے۔ایک مذمتی بیان میں رابطہ کمیٹی نے کہا کہ جیون آرائیں کو قتل کئے جانے کا واقعہ آزادی صحافت پر قدغن لگانے کے مترادف ہے جبکہ اس قسم کے افسوسناک واقعات کے ذریعے صحافیوں کو خوف و ہراس میں مبتلا کرکے انہیں فرائض منصبی سے روکنے کی سازش ہے۔رابطہ کمیٹی نے گورنر سندھ ڈاکٹر عشرت العباد خان ،وزیر اعلیٰ سندھ سید قائم علی شاہ اور دیگر متعلقہ حکام سے مطالبہ کیا ہے کہ جیون آرائیں کے قتل کا سختی سے نوٹس لیں اور واقعہ میں ملوث عناصر کو فوری انصاف کے کٹہرے میں لایا جائے۔رابطہ کمیٹی نے جیون آرائیں کے اہلِ خانہ اور دھرتی ٹی وی کے تمام افراد سے دلی تعزیت و ہمدردی کاا ظہار کرتے ہوئے کہا کہ دکھ کی اس گھڑی میں ہم آپ کے ساتھ ہیں۔ رابطہ کمیٹی نے دعا کی کہ اللہ تعالیٰ شہید کو جنت الفردوس میں اعلیٰ مقام عطا فرمائے اور لواحقین کو صبر جمیل عطا کرے۔(آمین)