پاکستان میں مختلف شورش زدہ علاقے حق گو صحافیوں کیلئے نو گو ایریاز کی حیثیت رکھتے ہیں، الطاف حسین

لندن۔۔۔۔2نومبر2014ء

متحدہ قومی موومنٹ کے قائد الطاف حسین نے اقوام متحدہ کی جانب سے صحافیوں کے خلاف جرائم میں ملوث افراد کا استثنیٰ ختم کرنے کیلئے 2نومبر کومنائے جانے والے عالمی دن کا خیر مقدم کرتے ہوئے اسے صحافی برادری کے تحفظ کیلئے اہم اقدام قرار دیاہے۔ اپنے خصوصی پیغام میں جناب الطاف حسین نے کہا کہ پاکستان میں بھی مختلف علاقے حق گو صحافیوں کیلئے نوگوایریاز کی حیثیت رکھتے ہیں اورملک کے ان شورش زدہ علاقوں میں کئی انتہاء پسند اور دہشتگرد گروپوں کی جانب سے صحافتی فرائض کی ادائیگی کے دوران صحافیوں کے اغواء ،ان پر تشدد اور قتل سمیت جرائم کے دیگر واقعات آئے روز رونما ہوتے رہتے ہیں لیکن اس صورتحال میں صحافیوں کو مؤثر تحفظ فراہم نہیں کیا جاتا ۔جناب الطا ف حسین نے کہا کہ اس حوالے سے اقوام متحدہ کی جانب سے منایا جانے والادن صحافی برادری کے تحفظ کیلئے اہم اقدام ثابت ہوگاکیونکہ یہ عصر حاضر کا تقاضہ ہے کہ صحافیوں کیخلاف جرائم میں ملوث عناصر اور گروپس کی سرکوبی کرکے ملک کے مختلف حصوں میں صحافیوں کو اپنی ذمہ داریاں ادا کرنے کی آزادی دلائی جائے اور فرائض کی انجا م دہی کے دوران زخمی یا شہید ہونے والے صحافیوں اور انکے اہل و عیال کو بہترین سہولیات او ر مراعات فراہم کرنے کیلئے قانونی ترامیم کرکے ان پر سختی سے عمل کیا جائے کیونکہ آج کے جدید دور میں عوام کو موجودہ صورتحال سے آگاہ رکھنے میں صحافیوں کا اہم کردار نا قابل فراموش ہے۔