ایم کیوایم ارکان قومی اسمبلی محترمہ کشور زہرا، محترمہ ثمن جعفری اور ارکان سندھ اسمبلی حاجی انور رضا اور افتخار کا عائشہ منزل کے نزدیک دستی بم حملہ سے نشانہ بنائے جانی والی امام بارگاہ، معصوم بچی بتول زہرا کی رہائشگاہ اور مقامی اسپتال کا دورہ

کراچی ۔۔۔28، اکتوبر2014ء 

متحدہ قومی موومنٹ کی رکن قومی اسمبلی و شعبہ خواتین کی انچارج محترمہ کشور زہرا ،حق پرست رکن قومی اسمبلی محترمہ ثمن جعفری ، حق پرست ارکان سندھ اسمبلی حاجی انور رضا اور افتخار عالم نے عائشہ منزل کے نزدیک دستی بم حملہ سے نشانہ بنائے جانے والی امام بارگاہ ، شہید ہونے والی معصوم بچی بتول زہراہ کی رہائشگاہ اور مقامی اسپتال کادورہ کیا اور دستی بم حملہ میں شہید ہونے والی معصوم بچی بتول زہرا کے لواحقین اور زخمی ہونے والے افراد کے اہل خانہ دلی تعزیت وہمدردی کااظہار کیا ۔ اس موقع پر ایم کیوایم فیڈرل ایریا سیکٹر کمیٹی کے اراکین بھی ان کے ہمراہ تھے ۔ اس موقع پر ایم کیوایم کے منتخب عوامی نمائندوں نے امام بارگاہ پر دستی بم حملہ کی شدید مذمت کرتے ہوئے کہاکہ اس میں ملوث دہشت گرد فرقہ واریت کو ہوا دینا چاہتے ہیں اور محرم الحرام کے مہینے کا تقدس پامال کرکے امت مسلمہ کے مسالک کے درمیان ایک دوسرے کیلئے نفرتیں پیدا کرنے کا مذموم عمل کررہے ہیں۔انہوں نے کہاکہ قائد تحریک جناب الطاف حسین محرم کے مہینے میں دہشت گردی کے اس واقعہ پر دکھی ہیں اور متاثرہ افراد کے ساتھ ہیں ۔ انہوں نے دعا کی کہ اللہ تعالیٰ معصوم بچی بتول زہرا کو جنت الفردوس میں اعلیٰ مقام عطا فرمائے ، سوگواران کو صبر جمیل عطاکرے اور زخمی افراد کو جلد ومکمل صحت یابی عطا فرمائے ۔