پاکستان صرف اور صرف مہاجروں کے آباؤ اجداد کی قربانیوں کا ثمر ہے ، بسمہ آصف سکھیرا

لاہور۔۔۔۔22 اکتوبر2014

متحدہ قومی موومنٹ لاہور کے زیراہتمام پریس کلب لاہور کے سامنے لفظ مہاجر کو گالی کہنے اور مہاجروں کے خلاف غلط زبان استعمال کرنے پر خورشید شاہ کے خلاف احتجاجی مظاہرہ کیا گیا ۔ جس میں سینٹرل ایگزیکٹو کونسل کی رکن بسمہ آصف سکھیرا، اراکین صوبائی تنظیمی کمیٹی پنجاب خالد اعوان ، محمد غوث ، سینٹرل پنجاب کے قائم مقام صدر اقبال قریشی ، سیکریٹری جنرل رانا اشرف ایڈووکیٹ اور لاہور ڈسٹرکٹ کے صدر سید ارتضیٰ حسین کاظمی سمیت ذمہ داران ، کارکنان و خواتین کی کثیر تعداد شریک تھی جنہوں نے خورشیدہ شاہ کے خلاف مذمتی بینرز اور پلے کارڈز بھی اٹھا رکھے تھے۔ اس موقع پر میڈیا کے نمائندوں سے گفتگو کرتے ہوئے بسمہ آصف سکھیرا اور اقبال قریشی نے کہا کہ پاکستان صرف اور صرف مہاجروں کے آباؤ اجداد کی قربانیوں کا ثمر ہے اور لفظ مہاجر کو گالی دینے والے شاید اسلام کی تعلیمات سے غافل ہیں۔ انہوں نے کہا کہ خورشید شاہ کا بیان انتہائی شرمناک ہے جس سے سندھ و پنجاب سمیت پاکستان بھر کے کروڑوں افراد کی دل آزاری ہوئی ہے۔ اس موقع پر شرکاء نے خورشید شاہ کے خلاف اور پیپلز پارٹی کی قیادت کے تعصبانہ رویے کے خلاف شدید نعرے بازی بھی کی۔