خورشیدشاہ کے خلاف توہین رسالت ؐ کے قانون کے مطابق کاروائی کی جائے،ڈاکٹرلیلیٰ پروین

کراچی :21؍اکتوبر 2014ء

متحدہ قومی موومنٹ سینٹرل ایگزیکٹوکونسل کی رکن ڈاکٹرلیلیٰ پروین نے مطالبہ کیاہے کہ لفظ مہاجرکوگالی کہنے اورمہاجروں کے خلاف غلط زبان استعمال کرنے پر پاکستان پیپلزپارٹی کے رہنماء وقومی اسمبلی میں اپوزیشن لیڈرسیدخورشیدشاہ کے خلاف آئین کے آرٹیکل295-Cکے تحت مقدمہ درج کیاجائے اور خورشید شاہ کے خلاف توہین رسالت ؐ کے قانون کے مطابق کاروائی کی جائے ۔یہ مطالبہ انہوں نے ایم کیوایم پنجابی سرائیکی آرگنائزنگ کمیٹی کے انچارج مجید رانااورپختون آرگنائزنگ کے انچارج شیرولی کے ہمراہ منگل کے روز کراچی پریس کلب میں پریس کانفرنس سے خطاب کے دوران کیا۔اس موقع پر کراچی کی سول سوسائٹی اوروکلاء کمیٹی کے افرادبھی موجودتھے۔ڈاکٹرلیلیٰ پروین نے کہاکہ سید خورشید شاہ نے لفظ مہاجرکے لئے جس اندازمیں غلط زبان استعمال کی اس سے مہاجرقوم کی دل آزاری ہوئی ہے ۔انہوں نے کہا کہ لفظ مہاجر کاذکرقرآن پاک میں ہے اور آپ ؐ بھی مہاجر ہیں۔انہوں نے پاکستان پیپلز پارٹی کی قیادت سے سوال کیاکہ لفظ مہاجرکو گالی قرار دے کرخورشید شاہ حضور پاک ؐ کی ذات مبارکہ کی توہین کے مرتکب نہیں ہوئے ؟ اورگذشتہ روز کراچی کی سول سوسائٹی اوروکلاء کمیٹی کے افرادنے آئین وقانون کے مطابق اس توہین کی فرسٹ انفارمیشن رپورٹ(FIR)درج کروانے کی کوشش کی تو برگیڈ تھانے کے ایس ایچ او نے دو گھنٹے تک انہیں انتظار کروایالیکن ایف آئی آردرج کرنے کی زحمت نہیں کی۔انہوں نے کہاکہ قانون جاگیرداروں اور وڈیروں اور بڑے لوگوں کے ہاتھ میں ہے سول سوسائٹی کی جانب سے ایک شخص کی ایف آئی آرتک درج نہیں کی جارہی جس کی جتنی بھی مذمت کی جائے کم ہے۔انہوں نے بتایاکہ سیدخورشیدشاہ کے خلاف ایف آئی آرکے لئے ہم نے آئی جی سندھ کوخط بھی ارسال کردیاہے اورایف آئی آردرج ہونے کے بعدمعروف قانون داں احمدرضاقصوری اوربیرسٹرمحمدعلی سیف کیس لڑیں گے۔