خورشید شاہ کا مہاجر قوم کے خلاف بیان کھلا تعصب اور نسل پرستانہ سوچ کا مظہر ہے،ایم کیو ایم بر طانیہ

لندن۔ 18اکتوبر2014

متحدہ قومی موومنٹ برطانیہ کی آرگنائزنگ کمیٹی نے اپنے ایک بیان میں پیپلز پارٹی کے رہنما سید خورشید شاہ کی مہاجروں کے متعلق ہرزہ سرائی کی شدید الفاظ میں مذمت کرتے ہوئے کہا کہ خورشید شاہ کا مہاجر قوم کے خلاف بیان کھلا تعصب اور نسل پرستانہ سوچ کا مظہر ہے۔مہاجر قوم وڈیروں اور جاگیرداروں کی رعایا نہیں بلکہ پاکستان کی سب سے زیادہ تعلیم یافتہ اور باشعور قوم ہے۔ماضی میں بھی کئی طرم خان مہاجروں کو صفحہء ہستی سے مٹانے اور بحیرہ عرب میں ڈبونے کے ناپاک خواب دیکھ چکے ہیں اور آج بھی خورشید شاہ اور ان جیسے متعصب وڈیرے مہاجر قوم کو اپنی رعایا اور غلام بنانے کے خواب دیکھ رہے ہیں۔ انہیں یہ تاریخی حقیقت یاد رکھنی چاہئے کہ مہاجروں کے آباؤ اجداد کی قربانیوں کے سبب پاکستان معرض وجود میں آیا۔ خورشید شاہ کو مہاجروں کو گالی دینے کی بجائے ان کا احسان مند ہونا چاہئے کہ اگر ہمارے آباؤ اجداد قیام پاکستان کے لئے جدوجہد نہ کرتے تو خورشید شاہ اور ان جیسے کم ظرف لوگ آج بھی ہندؤں کے غلام ہوتے۔ اراکین آرگنائرنگ کمیٹی نے کہا کہ پیپلز پارٹی کی قیادت ماضی کی غلطیوں سے سبق حاصل کرنے کی بجائے سندھ میں محاذ آرائی کی فضا پیدا کرنا چاہتی ہے تاکہ سندھ کے مستقل باشندوں کے درمیان خلیج پیدا کی جاسکے۔