حیدرآباد میں ایم کیوایم کے کارکن سید مجتبیٰ حسن کو مسلح دہشت گردوں نے اس وقت نشانہ بنا کر گولیاں ماریں جب وہ موٹرسائیکل پر اپنے تین چھوٹے بچوں کے ساتھ دودھ لینے جارہے تھے

حیدرآباد۔۔۔15 اکتوبر2014ء

بدھ کی شب حیدرآبادمیں مسلح دہشت گردوں کی فائرنگ سے شہیدہونے والے ایم کیوایم کے کارکن سیدمجتبیٰ حسن شہید کواسٹیشن روڈپر مسلح دہشت گردوں نے اس وقت باقاعدہ نشانہ بنا کر گولیاں ماریں جب وہ موٹرسائیکل پر اپنے تین چھوٹے بچوں کے ساتھ دودھ لینے جارہے تھے۔ سید مجتبیٰ حسن شہیدکوتین گولیاں لگیں، فائرنگ کے باعث حسن علی کی موٹرسائیکل بھی الٹ گئی جس سے موٹرسائیکل پر سوار سید مجتبیٰ حسن کے تینوں بچے چھ سالہ بیٹی وجیہہ زہرا، چارسالہ بیٹی حریم زہرا اورتین سالہ بیٹا نقی زیدی زخمی ہوگئے ۔ سیدمجتبیٰ حسن کو شدید زخمی حالت میں سول اسپتال لے جایاگیا لیکن وہ جانبرنہ ہوسکے اورزخموں کی تاب نہ لاتے ہوئے خالق حقیقی سے جاملے۔واقعہ کی اطلاع ملتے ہی ایم کیوایم حیدرآبادکے زونل انچارج نویدشمسی، زونل کمیٹی کے دیگرارکان ، حق پرست ارکان اسمبلی اورکارکنوں کی بڑی تعداد اسپتال پہنچ گئی ۔ ایم کیوایم کے مقامی رہنماؤں نے سیدمجتبیٰ حسن شہید کے چھوٹے بھائی حسن رضا اوردیگرلواحقین کودلاسہ دیا۔سیدمجتبیٰ حسن شہیدعرف کاکا بھائیکی عمر46سال تھی ، ان کے پسماندگان میں بیوہ اورچاربچے شامل ہیں۔شہید کے سب سے چھوٹے بچے اصغرزیدی کی عمر چار ماہ ہے سیدمجتبیٰ حسن شہید ایم کیوایم کے سیکٹرڈی کے یونٹ 5 ۔اے کے سرگرم کارکن تھے ۔سیدمجتبیٰ حسن شہید سماجی سرگرمیاں بھی انجام دیتے تھے اوروہ انجمن حیدری کربلادادن شاہ کے صدر تھے اورقدم گاہ مولاعلی پر زیارتوں کے انتظامات میں بھی بڑھ چڑھ کرحصہ لیتے تھے۔ سیدمجتبیٰ حسن شہید کا پوراگھرانہ ایم کیوایم سے وابستہ ہے،ان کے چھوٹے بھائی حسن رضا تلک چاڑی سے سابق حق پرست نائب یوسی ناظم بھی رہ چکے ہیں ۔ سیدمجتبیٰ حسن شہید کی نمازجنازہ کل بروز جمعرات بعدنمازظہراداکی جائے گی جس کے بعدشہیدکے جسدخاکی کومقامی قبرستان میں سپردخاک کیاجائے گا۔