کراچی سینٹرل جیل سے کالعدم تنظیموں کے خطرناک قیدیوں کو چھڑانے کے سنگین منصوبے کے انکشاف پرایم کیوایم کے قائد الطاف حسین کا اظہار تشویش
میں کافی عرصہ سے اس قسم کے خطرات سے آگاہ کررہا ہوں کہ دہشت گرد عناصر کراچی کے مختلف علاقوں میں اپنے ٹھکانے قائم کررہے ہیں
کراچی کے شہریوں سے اپیل کرتاہوں کہ وہ اپنے اپنے علاقوں میں نئے رہائش اختیار کرنے والے افراد پر نظر رکھیں
عوام اگر کہیں بھی کوئی مشکوک سرگرمی دیکھیں تو فوری طور پر پولیس، رینجرز اور انتظامیہ کو اس سے آگاہ کریں تاکہ کسی بھی قسم کی دہشت گردی کو بروقت ناکام بنایا جاسکے۔ الطاف حسین
دہشت گردی کے خلاف جنگ کو کامیابی سے ہمکنار کرنے کیلئے عوام اور سیکوریٹی اداروں کا تعاون ضروری ہے۔ الطاف حسین
لندن ۔۔۔ 13 اکتوبر2014ء
متحدہ قومی موومنٹ کے قائدجناب الطاف حسین نے کراچی سینٹرل جیل کے قریب سرنگ بناکرجیل سے کالعدم تنظیموں کے خطرناک قیدیوں کوقیدسے چھڑانے کے منصوبے کے انکشاف پرتشویش کااظہارکیاہے ۔ اپنے ایک بیان میں انہو ں نے کہاکہ میں کافی عرصہ سے کراچی کے عوام کواس قسم کے خطرات سے آگاہ کررہاہوں کہ دہشت گرد عناصرکراچی کے مختلف علاقوں میں اپنے ٹھکانے قائم کررہے ہیں۔ میں ایک مرتبہ پھرکراچی کے شہریوں سے اپیل کرتا ہوں کہ وہ اپنے اپنے علاقوں میں نئے رہائش اختیارکرنے والے افراد پر نظر رکھیں اور اگر کہیں بھی کوئی مشکوک سرگرمی دیکھیں تو فوری طور پر پولیس، رینجرز اورانتظامیہ کواس سے آگاہ کریں تاکہ کسی بھی قسم کی دہشت گردی کوبروقت ناکام بنایا جاسکے۔ جناب الطاف حسین نے کہاکہ دہشت گردی کے خلاف جنگ کو کامیابی سے ہمکنارکرنے کیلئے عوام اورسیکوریٹی اداروں کاتعاون ضروری ہے۔