جناب الطاف حسین کی کوئٹہ میں ڈی ایس پی پشتون آباد محمد نعیم اورکوہاٹ کے پشاور چوک پربم حملوں کی مذمت
دہشتگرد ملک میں امن و امان کی صورتحال خراب کرنا اورعوام میں خوف و ہراس پھیلانا چاہتے ہیں،الطاف حسین
معصوم شہریوں کو قتل کرنے والے انسان کہلانے کے مستحق نہیں ،دہشتگردپاکستان کے کھلے دشمن ہیں اور کار روائیاں ان کی ملک دشمنی کا واضح ثبوت ہیں، الطاف حسین
کوہاٹ اور کوئٹہ بم دھماکوں کا فوری نوٹس لیکر ملوث عناصر کو قانون کی گرفت میں لایا جائے ، وفاقی و صوبائی حکومتوں سے مطالبہ
دونوں دھماکوں کے نتیجے میں متعدد افراد کے جاں بحق اور زخمی ہونے پر دکھ کا اظہار، لواحقین سے دلی ہمدردی ، جاں بحق افراد کے درجات کی بلندی اور زخمیوں کی جلد صحتیابی کے لئے دعا
لندن ۔۔۔4اکتوبر 2014ء
متحد ہ قومی موومنٹ کے قائد جناب الطاف حسین نے کوئٹہ کے اسیپنی روڈپرڈی ایس پی پشتون آباد محمدنعیم کی گاڑ ی کے نزدیک اور کوہاٹ کے علاقے پشاور چوک پر بم دھماکو کی سخت الفاظ میں مذمت کی ہے ۔ایک مذمتی بیان میں جناب الطاف حسین نے کہاکہ دہشتگرد تواتر کے ساتھ ملک کے مختلف حصوں میں سیکورٹی اداروں کے اعلیٰ افسران اور معصوم شہریوں کو نشانہ بناکر ملک امن و امان کی صورتحال خراب کرنے اورعوام میں خوف و ہراس پھیلانے کی ساز شیں کر ر ہے ہیں ۔ انہوں نے کہا کہ معصوم شہریوں کو قتل کرنے والے انسان کہلانے کے بھی مستحق نہیں ہیں اور ایسے عناصر ملک میں انتشار برپا کرنے کے خواہش مند ہیں ،دہشتگردپاکستان کے کھلے دشمن ہیں اور دہشتگردی کی مذکورہ کار روائیاں ان کی ملک دشمنی کا واضح ثبوت ہیں جناب الطاف حسین نے کہا کہ بم دھماکوں میں متعدد افراد کے جاں بحق و زخمی ہونے پر میرا دل انتہائی غمگین ہے انہوں نے متاثرین کے سوگوار لواحقین سے دلی ہمدردی کااظہار کرتے ہوئے دعا کی کہ اللہ تعالیٰ ان افسوسناک واقعات میں جاں بحق ہونے والے افراد کے درجات بلند کر کے انہیں اپنی جوار رحمت میں جگہ عطا فرمائے اور زخمیوں کو جلد و مکمل صحتیابی عطا کرے ۔ جناب الطاف حسین نے وزیر اعظم پاکستان میاں محمد نواز شریف ،وفاقی وزیر داخلہ چوہدری نثار علی خان اور صوبائی حکومتوں سے مطالبہ کیا کہ وہ دونوں بم دھماکوں میں ملوث عناصر اور انکے سر پرستوں کو قانون کی گرفت میں لاکر عوام کے جان و مال کے تحفظ فراہم کرنے کیلئے فوری اقدامات یقینی بنائیں ۔