ایم کیوایم حیدرآبادزون کے کارکنان جلدہی شہر میں ایک بڑا جلسہ عام کرکے ثابت کردیں کہ حیدرآبادآج بھی حق پرستوں کاقلعہ ہے۔الطاف حسین

لندن۔۔۔3 اکتوبر2014ء

متحدہ قومی موومنٹ کے قائدجناب الطاف حسین نے کہاہے کہ ایم کیوایم حیدرآبادزون کے ذمہ داران وکارکنان جلدہی شہر میں ایک بڑا جلسہ عام کرکے ثابت کردیں کہ حیدرآبادآج بھی حق پرستوں کاقلعہ ہے۔ انہوں نے یہ بات جمعہ کی شب ایم کیوایم حیدرآبادکی زونل کمیٹی کے ارکان سے فون پر گفتگوکرتے ہوئے کہی۔ جناب الطاف حسین نے زونل کمیٹی میں سینئرکارکنوں سہیل مشہدی اوررفیق اجمیری کی شمولیت پر ایم کیوایم حیدرآبادکے زونل انچارج نویدشمسی اورزون کے تمام ذمہ داروں اورکارکنوں کوکومبارکبادپیش کی اور پرانے ساتھیوں کا خوشدلی کے ساتھ خیرمقدم کرنے پرانہیں شاباش دی۔ انہوں نے سہیل مشہدی اوررفیق اجمیری کوبھی تلقین کی کہ وہ زون کے دیگرذمہ داران کے ساتھ ملکرایک خاندان کی طرح حیدرآباد زون میں تحریک کے نظریاتی کام کوپھیلائیں اورمزیدمنظم کریں ۔ جناب الطا ف حسین نے حیدرآبادکے حق پرست ارکان اسمبلی پربھی ذوردیا کہ وہ شہرکے عوام کے مسائل کے حل کیلئے بھرپورکوششیں کریں۔انہوں نے حیدرآبادزون کے ساتھیوں کوحج اکبر کی مبارکبادپیش کرتے ہوئے کہاکہ آج اللہ تعالیٰ کی رحمتوں اوربرکتوں کے نزول کادن ہے ۔انہوں نے کارکنوں کوعیدالاضحی کی پیشگی مبارکبادبھی پیش کی۔اس موقع پر حیدرآبادزون کے ذمہ داران نے بھی جناب الطاف حسین کوحج اکبراورعیدالاضحی کی مبارکبادپیش کی اورانہیں یقین دلایاکہ حیدرآبادزون کے کارکنان ماضی کی طرح شہر کو تحریک کاقلعہ ثابت کریں گے اوراس کے لئے اپنی تمام ترصلاحیتیں بروئے کارلائیں گے۔