شبقدر میں نجی اسکول کے گرلز سیکشن پر دستی بم حملے اور خاتون ٹیچر کی ہلاکت پر الطاف حسین کا اظہار مذمت
تعلیم دشمن عناصر خواتین پر تعلیم کے دروازے بند کرنے کے لئے اسکولوں کو دہشت گردی کا نشانہ بنارہے ہیں، الطاف حسین
جاں بحق خاتون ٹیچر کی مغفرت اور زخمیوں کی صحت یابی کے لئے دعا
چارسدہ کی تحصیل شبقدر میں گرلز اسکول پر دستی بم حملے کا نوٹس لیا جائے اور تعلیم دشمن عناصر اور ان کے سرپرستوں کو گرفتار کرکے عبرتناک سزادی جائے، الطاف حسین کا وزیراعظم، وزیرداخلہ اور خیبرپختونخواہ حکومت سے مطالبہ
لندن:۔۔۔یکم؍اکتوبر2014ء
متحدہ قومی موومنٹ کے قائدجناب الطا ف حسین نے چارسدہ کی تحصیل شبقدرمیں نجی اسکول کے گرلزسیکشن پربم حملے کی سخت ترین الفاظ میں مذمت کی اوراس کے نتیجے میں خاتون ٹیچرکے جاں بحق ہونے پردلی رنج وغم کااظہارکیا ہے ۔ایک بیان میں جناب الطاف حسین نے کہاکہ درندہ صفت تعلیم دشمن دہشت گردخواتین پرتعلیم کے دروازے بند کرنے کے لئے اسکولوں کودہشت گردی کانشانہ بنارہے ہیں۔انہوں نے گرلزاسکول پردستی بم حملے کوکھلی دہشت گردی قراردیتے ہوئے کہاکہ خواتین کوجہالت کے اندھیروں میں دھکیلنے اورانہیں تعلیم سے دورکرنے کے لئے بزدلانہ کارروائیاں کی جارہی ہیں اور اس سے قبل بھی یہ دہشت گردمتعددگرلزاسکولوں کوبم دھماکوں سے تباہ کرچکے ہیں۔جناب الطاف حسین نے دھماکے میں جاں بحق ہونیوالے اسکول ٹیچرکے سوگواراہل خانہ سے دلی تعزیت و ہمدردی کااظہارکرتے ہوئے دعاکی کہ اللہ تعالیٰ مرحومہ کواپنی جواررحمت میں اعلیٰ مقام عطافرمائے اورزخمیوں کوصحت یابی عطاکرے۔جناب الطاف حسین نے وزیراعظم میاں محمدنواز شریف،وفاقی وزیرداخلہ چوہدری نثارعلی خان اورخیبرپختونخواہ کی حکومت سے مطالبہ کیاکہ چارسدہ کی تحصیل شبقدرمیں گرلزاسکول پردستی بم حملے کانوٹس لیاجائے اورتعلیم دشمن عناصراوران سرپرستوں کوگرفتارکرکے عبرتناک سزادی جائے۔