وزیراعلیٰ سندھ قائم علی شاہ کا لندن میں ایم کیوایم کے رہنماؤں فاروق ستار اور بابرغوری سے رابطہ

لندن۔۔۔24، ستمبر2014ء

وزیراعلیٰ سندھ سید قائم علی شاہ نے ایم کیوایم انٹرنیشنل سیکریٹریٹ لندن فون کرکے رابطہ کمیٹی کے ارکان ڈاکٹر فاروق ستار اور سینیٹر بابرخان غوری سے بات کی اور ایم کیوایم کے سیکٹر آفس واقع اسکیم 33 پررینجرز کے چھاپے کی تفصیلات معلوم کیں۔ اس موقع پر ڈاکٹر فاروق ستار اور بابر غوری نے وزیراعلیٰ سندھ کو بتایا کہ آج ابوالحسن اصفہانی روڈ پر واقع ایم کیوایم کے سیکٹرآفس پر کارکنان کے اجلاس کے دوران رینجرز نے بلاجواز چھاپہ مارا اور 40 سے زائد کارکنان کو بہیمانہ تشدد کا نشانہ بناتے ہوئے گرفتارکرلیا، چھاپہ کے دوران رینجرز کے اہلکاروں نے شدید فائرنگ اور سیکٹرآفس میں توڑپھوڑکی۔ انہوں نے مزید بتایا کہ جب گرفتارشدگان کی رشتہ دار خواتین نے اس ظالمانہ کارروائی کے خلاف احتجاج کیا تو پولیس اہلکاروں نے انہیں فحش مغلظات بکیں اور خواتین کو بالوں سے پکڑکر تشدد کا نشانہ بنایا۔ایسا محسوس ہوتا ہے کہ ایم کیوایم کی سیاسی سرگرمیوں پر پابندی عائد کردی گئی ہے اور ایک مرتبہ پھر ایم کیوایم کے خلاف ریاستی طاقت کا ناجائز استعمال کرکے پرامن عوام کو مشتعل کرنے کی کوشش کی جارہی ہے جس کی جتنی بھی مذمت کی جائے کم ہے ۔ ڈاکٹرفاروق ستار اور بابرغوری نے وزیراعلیٰ سندھ سید قائم علی شاہ سے کہاکہ وہ ایم کیوایم کے خلاف ریاستی مظالم کا سنجیدگی سے نوٹس لیں، ظالمانہ کارروائی کا سلسلہ فی الفور بند کرائیں اور بے گناہ گرفتارشدگان کی رہائی کیلئے اپنا کردار ادا کریں۔

وزیراعلیٰ سندھ سید قائم علی شاہ نے ایم کیوایم کے دفتر پر رینجرز کے چھاپے اور خواتین پر پولیس اہلکاروں کے بہیمانہ تشدد پر افسوس کا اظہار کیا۔ انہوں نے ایم کیوایم کے رہنماؤں کو یقین دلایا کہ ایم کیوایم ، حکومت کی حلیف جماعت ہے اور اس کے خلاف ظالمانہ کارروائیاں قابل مذمت ہیں ۔ انہوں نے مزید کہاکہ وہ اس سلسلے میں رینجرز اورپولیس کے اعلیٰ حکام سے فوری رابطہ کریں گے اورایم کیوایم کے گرفتارکارکنان کی رہائی کیلئے اپنا ہرممکن کردار ادا کریں گے ۔ انہوں نے ایم کیوایم کے رہنماؤں سے اپیل کی کہ وہ اس ظالمانہ کارروائی کے نتیجے میں عوامی جذبات کو قابو میں رکھنے کیلئے اپنا کرداراداکریں اور عوام سے پرامن رہنے کی اپیل کریں۔