پنجاب کے ڈسٹرکٹ کاہنہ میں بچوں کے ٹیوشن سینٹرکی چھت منہدم ہونے کے نتیجے میں 14بچوں کے جاں بحق اوردرجنوں بچوں اور ٹیچرز کے زخمی ہونے کاواقعہ ایک المناک سانحہ ہے، میں اس سانحے پر دلی افسوس اورگہرے رنج وغم کااظہارکرتاہوں۔
اس سانحے کے بارے میں پولیس کی ابتدائی رپورٹ کے مطابق کاہنہ میں ٹیوشن سینٹرکی چھت پر تعمیراتی کام ہورہا تھا جبکہ گراؤنڈ فلورپر بچے ٹیوشن پڑھ رہے تھے۔ تعمیراتی کام کے دوران چھت منہدم ہوگئی جس کے نتیجے میں درجنوں بچے اور ٹیچرز دب گئے جن میں 14 بچے معصوم جاں بحق ہوگئے اور کئی بچے زخمی ہوگئے۔ ان بچوں کی عمریں چھ سال سے 12سال کے درمیان تھیں۔
اس سانحہ میں معصوم بچوں کی شہادت پرمیرادل خون کے آنسو رورہاہے، میں اس سانحے پر ان بچوں کے اہل خانہ کے غم میں برابرکاشریک ہوں اوردعاکرتاہوں کہ اللہ تعالیٰ شہیدبچوں کوجنت الفردوس میں جگہ عطا فرمائے اورتمام سوگواروں کوصبرجمیل عطا فرمائے اورزخمی ہونے والے بچوں کوصحت عطاکرے۔
میں حکومت پنجاب سے مطالبہ کرتاہوں کہ اس واقعہ کی مکمل تحقیقات کرائی جائے اوراس کے ذمہ داروں کوسخت سے سخت سزادی جائے۔
الطاف حسین