خدمت خلق فاؤنڈیشن کے تحت پنجاب کے مختلف اضلاع میں سیلاب متاثرین میں بھاری مقدار میں امدادی سامان کی تقسیم جاری

جھنگ۔۔۔۔15،ستمبر ،2014

متحدہ قومی موومنٹ کے فلاحی ادارے خدمتِ خلق فاؤنڈیشن کی جانب ضلع جھنگ کے متاثرہ دیہاتوں میں سیلاب متاثرین میں لاکھوں روپے مالیت کا امدادی سامان ،خشک غذائی اجناس اور پینے کا صاف پانی وافر مقدار میں تقسیم کیا گیا ۔ غذائی اجناس میں آٹا ، چاول ،مختلف اقسام کی دالیں ، گھی ، تیل ، شکر ، چائے کی پتی اور خشک دودھ پر مشتمل راشن بیگ شامل تھے جو ایم کیو ایم کی رابطہ کمیٹی کے ارکان سیف یار خان ، اسلم خان آفریدی ،ارکان صوبائی تنظیمی کمیٹی ریاض احمد ، جمیل اختر ،ایم کیو ایم اپر پنجاب کے صدر حاجی عتیق عباسی،سینئر نائب صدر شہاب امیر، ارکان اپر پنجاب کمیٹی ندیم خان اور ضلع جھنھ کے صدر رانا کلیم و اراکین کمیٹی نے متاثرین سیلاب میں تقسیم کیئے اور متاثرین سے مکمل ہمدردی و یکجہتی کا اظہار کیا ۔ اس موقع پر ارکان رابطہ کمیٹی سیف یا ر خان اور اسلم آفرید ی نے کہا کہ سیلاب کے متاثرین جو کہیں تو کھلے آسمان تلے پڑے ہوئے ہیں اور کہیں خیموں ، اسکولوں اور کیمپوں میں پناہ لی ہوئی ہے انہیں پوچھنے والا کوئی نہیں ہے لیکن اگر آج ملک بھر میں بلدیاتی نمائندے ہوتے تو وہ اپنے اپنے علاقوں میں متاثرین کی خبر گیری کرتے اور ان مصیبت زدہ لوگوں کی پریشانیاں دور کرنے اور انکی دادرسی کیلئے خدمات انجام دیتے ۔ انہوں نے کہا کہ ملک اس وقت غیر معمولی صورتحال سے دوچار ہے اور یہ غیر معمولی صورتحال غیر معمولی اقدامات کا تقاضا کررہی ہے، اسی لیے اگر ملک بھر میں بلدیاتی نظام بحال کر دیا جائے تو سیلاب زدگان کے تمام مسائل جلد ازجلد حل ہوجائینگے ۔انہوں نے کہا کہ آج جب تمام سیاسی جماعتیں سیاست میں مصروف ہیں واحد ایم کیو ایم ہے جو قائد تحریک جناب الطاف حسین کی خصوصی ہدایت پر خدمت خلق فاؤنڈیشن کے پلیٹ فارم سے بلا تفریق رنگ ، نسل و زبان متاثرین سیلاب کی امداد کررہی ہے اور انہیں اشیاء خورد نوش اور دیگر ضروریاتِ زندگی کی اشیاء فراہم کر رہی ہے ۔