سندھی قوم پرست ، مہاجروں کو احتجاج کی دھمکیاں دینے سے گریز کریں، سندھ تنظیمی کمیٹی

کراچی۔۔۔14، ستمبر2014ء

ایم کیوایم کی سندھ تنظیمی کمیٹی کے ارکان نے کہاہے کہ نام نہادسندھی قوم پرست ، سندھ دھرتی کے مہاجربیٹوں کو احتجاج کی دھمکیاں دینے سے گریز کریں۔ اپنے مشترکہ بیان میں انہوں نے سندھ ترقی پسند کے قائم مقام چیئرمین جام عبدالفتح سمیجو کے بیان پر تبصرہ کرتے ہوئے کہاکہ نام نہاد سندھی قوم پرست، مہاجر وزیراعلیٰ سندھ کو قبول کرکے ثابت کریں کہ صوبہ سندھ میں برسوں سے بسنے والے سندھ دھرتی کے بیٹے ہیں۔ انہوں نے کہاکہ سندھ میں بسنے والے مہاجر ، سندھ دھرتی کی تقسیم نہیں چاہتے لیکن نام نہاد قوم پرست متعصبانہ طرزعمل اختیار کرکے مہاجروں کو سندھ دھرتی کی تقسیم کی جانب دھکیل رہے ہیں۔سندھ تنظیمی کمیٹی نے کہاکہ صوبہ سندھ کی انتظامی بنیادوں پر تقسیم کے حوالہ سے قائد تحریک جناب الطاف حسین کا بیان حقائق پر مبنی ہے ، اگر نام نہاد قوم پرستوں کی جانب سے سندھ دھرتی کے کروڑوں مہاجرو ں کے ساتھ متعصبانہ طرزعمل تبدیل نہ کیا گیاتو انتظامی بنیادوں پرسندھ دھرتی کی تقسیم قطعی فطری ہوگی۔