الطاف حسین نے نوجوانوں کو عملی طور پر ملک کے اعلیٰ ایوانوں کا حصہ بنا کر ملک کی سیاست میں منفرد مثال قائم کی ہے، سید حیدر عباس رضوی

کراچی ۔۔۔10ستمبر2014ء

آل پاکستان متحدہ اسٹوڈینٹس آرگنائزیشن کے زیر اہتمام جامعہ کراچی میں منعقدہ سالانہ کارنیوال کے تیسرے روز جامعہ کراچی کے مختلف شعبہ جات سے تعلق رکھنے والے طلباوطالبات کی بڑی تعداد نے شرکت کی۔ اس موقع پر ایم کیو ایم کی رابطہ کمیٹی کے رکن سید حیدر عباس رضوی نے طلباء و طالبات سے گفتگو کرتے ہوئے کہا کہ جناب الطاف حسین ملک کے واحد سیاسی رہنما ہیں جنہوں نے نوجوانوں کے لئے صرف پرکشش نعرے نہیں لگائے بلکہ ملک کی ترقی کے لئے نوجوانوں کو عملی طور سے ملک کے اعلیٰ ایوانوں کا حصہ بنایا اور اپنی جماعت میں بھی نوجوانوں کو اہم ذمہ داریوں کا حصہ بنا کر ملک کی سیاست میں منفرد مثال قائم کی ہے ۔انہوں نے کہا کہ اے پی ایم ایس او کے قیام کا مقصد بھی ملک میں نوجوانوں بالخصوص طلبا و طالبات کو بہتر اور یکساں تعلیمی نظام فراہم کرنا تھا۔اس موقع پر اے پی ایم ایس او کے انچارج توصیف اعجاز ، اراکین مرکزی کابینہ، حق پرست رکن صوبائی اسمبلی عدنان احمد نے بھی انکے ہمراہ تھے ۔ سالانہ کارنیوال کے تیسرے روزطلبہ اور ملک کے معروف گلوکاروں نے اپنے فن کا مظاہرہ کیا اور جامعہ کراچی میں اے پی ایم ایس او کی نصابی و ہم نصابی سرگر میوں کو سراہا ۔ تقریب سے اے پی ایم ایس او کے انچارج توصیف اعجاز نے خطاب کرتے ہوئے کہا کہ اے پی ایم ایس او نے طلباء کو اپنے جائز حقوق کے لئے آواز بلند کر نے کی ہمت دی اور آج بھی اے پی ایم ایس او جناب الطاف حسین کے فکر و فلسفے پر عمل کرتے ہوئے ملک میں ایک ایسے نظام تعلیم کے لئے کوشاں ہے جہاں ملک میں بسنے والے ہر شہری کو یکساں معیار کی تعلیم میسر آئے۔