پنجاب میں شدید بارشوں اور طغیانی کے نتیجے میں معصوم بچوں اور خواتین سمیت 40سے زائد قیمتی انسانی جانوں کے ضیاع اورقیمتی املاک کے نقصان پر الطاف حسین کا اظہار افسوس

لندن ۔۔۔۔5ستمبر2014ء

متحد ہ قومی موومنٹ کے قائد الطاف حسین نے صوبہ پنجاب میں شدید بارشوں سے طغیانی اور سیلاب کے نتیجے میں معصوم بچوں ، خواتین سمیت 40سے زائد قیمتی انسانی جانوں کے ضیاع ، متعدد کے زخمی ہونے اورقیمتی املاک کے نقصان پر گہرے دکھ اور افسوس کا اظہار کیا ہے۔ جناب الطا ف حسین نے کہا کہ شدید بارشوں اور طغیانی کے نتیجے میں اتنی بڑی تعداد میں انسانی جانوں اور املاک کا نقصان ملکی تاریخ کا بڑا اور افسوس ناک سانحہ ہے جس پر میرا دل شدید غم و صدمے میں مبتلا ہے۔جناب الطاف حسین نے ملک بھر کے عوام سے کہا کہ وہ اس قومی سانحہ کرمحسوس کرتے ہوئے موسلا دھار بارشوں کے نتیجے میں جاں بحق ہونے والے معصوم بچوں ، خواتین سمیت تمام مرحومین کے لئے دعائیں کریں ۔ جنا ب الطاف حسین نے وفاقی و پنجاب کی صوبائی حکومت سے مطالبہ کیا کہ وہ پنجاب میں شدید بارشوں کے سبب لاہور،راولپنڈی ،فیصل آباد، گجرات ، سیالکوٹ ، کامونکی ، نارروال ، قصور ، سمندری ، گوجرانوالہ سمیت پنجاب کے مختلف اضلاع میں جاری بارشوں کے شدید سلسلے کے دوران عوام کے جان و مال کے تحفظ کو یقینی بنانے کے لئے ہر ممکن اقدامات کریں، شدید بارشوں کے نتیجے میں عوامی املاک کے نقصا ن کی ہر ممکن تلافی کی جائے ، زخمیوں کو سرکاری سطح پر بہترین طبی سہولیات فراہم کی جائیں اورکسی بھی ہنگامی صورتحال سے بچنے کے لئے پیشگی اقدامات بروئے کار لائیں ۔جناب الطاف حسین نے دعا کی کہ اللہ تعالیٰ بارشوں کے نتیجے میں مختلف واقعات میں جاں بحق ہونے والے افراد کے درجات بلند فرمائے ، زخمیوں کو جلد و مکمل صحتیابی عطا کرے اور سوگوارلواحقین کو یہ صدمہ برداشت کرنے کی ہمت عطا کرے۔