احتجاج کی کوریج کے دوران میڈیا نمائندگان کو حراساں اورتشدد کرنے کے واقعات قابل مذمت ہیں ، ایم کیو ایم رابطہ کمیٹی

کراچی ۔۔۔31اگست2014ء

متحد ہ قومی موومنٹ کی رابطہ کمیٹی نے ملک کے مختلف شہروں بالخصوص وفاقی دارالحکومت اسلام آباد میں دوران کوریج پولیس کی جانب سے مختلف الیکٹرانک میڈیا کے رپورٹرز ، کیمرہ مین اور اسٹاف پر تشدد اور حراساں کئے جانے کے واقعات کی سخت الفاظ میں مذ مت کی ہے ۔ایک مذمتی بیان میں رابطہ کمیٹی نے کہاکہ ملک میں موجودہ بحران کی حقیقی صورتحال سے لمحہ بہ لمحہ پوری قوم کو آگاہ کرنا صحافی برادری کا فرض ہے لہٰذا انہیں اس فرض کی ادائیگی کے دوران تشدد کا نشانہ بنانا اور عوام تک حقائق پہنچانے سے روکنا بنیادی انسانی حقوق کی خلاف ورزی اور آزادی صحافت پر حملہ ہے ۔ رابطہ کمیٹی نے وفاقی وزیر داخلہ چوہدری نثار علی خان ، وفاقی وزیر اطلاعات اور پولیس کے اعلیٰ حکام سے مطالبہ کیا کہ وہ صحافیوں کے جان و مال کے تحفظ کو ہر قیمت پر یقینی بنائیں ۔