ایم کیوایم کی رابطہ کمیٹی کے ارکان حیدر عباس رضوی اور اسلم آفریدی کی گلگت بلتستان میں معروف عالم دین سید آغا راحت علی سے ملاقات
ملک کے داخلی استحکام کیلئے جناب الطاف حسین کی جانب سے اٹھائے جانے والے اقدامات مثبت اور خوش آئند ہیں، سید آغا راحت علی
جناب الطاف حسین گلگت بلتستان کے قدرتی حسن کو نکھار کر یہاں کے عوام کیلئے سہولیات پیدا کرنا چاہتے ہیں، حیدر عباس رضوی، اسلم آفریدی
ملاقات میں گلگت بلتستان کے عوام کے مسائل پر تفصیلی تبادلہ خیال بھی کیا گیا
گلگت بلتستان ۔۔۔11، اگست2014ء
متحدہ قومی موومنٹ کی جانب سے گلگت بلتستان میں مختلف سیاسی ، سماجی اور مذہبی جماعتوں کے رہنماؤں اور مختلف طبقہ فکر سے تعلق رکھنے والی شخصیات سے ملاقاتوں کا سلسلہ جاری ہے ۔ اس سلسلے میں گزشتہ روز ایم کیوایم کی رابطہ کمیٹی کے ارکان حید رعباس رضوی اور اسلم آفریدی نے معروف عالم دین سید آغا راحت علی سے ملاقات کی اور گلگت بلتستان کے عوام کے مسائل پر تبادلہ خیال کیا ۔ اس موقع پرایم کیوایم گلگت بلتستان کمیٹی کے انچارج عارف شاہ اور اراکین بھی ان کے ہمراہ موجود تھے ۔ ملاقات میں سید آغا راحت علی نے ملک کے داخلی استحکام اور سا لمیت کیلئے جناب الطاف حسین کی جانب سے اٹھائے جانے والے اقدامات کو سراہا اور انہیں ملک و قوم کیلئے مثبت اور خوش آئند قرار دیا ۔ انہوں نے کہا کہ جناب الطاف حسین ملک کے واحد لیڈر ہیں جنہوں نے گلگت بلتستان کے عوام کی ترجمانی کرتے ہوئے حکومت سے گندم پر سبسڈی کا مطالبہ کیا اور اس مسئلے کو ایوانوں میں اٹھایا جس پرگلگت بلتستان کے عوام جناب الطاف حسین کے مشکور ہیں ۔ حیدر عباس رضوی اور اسلم آفریدی نے سید آغا راحت علی کے خیالات کو سراہا اور کہا کہ جناب الطاف حسین ملک بھر کی مظلوم قومیتوں کے قائد ہیں اور یہی وجہ ہے کہ ایم کیوایم میں آج ہر قومیت سے تعلق رکھنے والے غریب ومتوسط طبقے کے مظلوم عوام شامل ہیں اور پاکستان کو بچانے اور جاگیردارانہ نظام کے خاتمے کی عملی جدوجہد کا حصہ بن چکے ہیں ۔ رابطہ کمیٹی کے ارکان نے مزید کہاکہ جناب الطاف حسین گلگت بلتستان اور اس کے عوام کو خوشحال اور باوقار زندگی گزارنے کے مواقع دینا چاہتے ہیں اور گلگت بلتستان کے قدرتی حسن کو نکھار کر یہاں کے عوام کیلئے سہولیات پیدا کرنا چاہتے ہیں۔ بعدازاں رابطہ کمیٹی کے ارکان نے اسماعیلی ریجنل کمیٹی سے ملاقات کی اور آغا ضیاء الدین شہید کی قبر پر حاضری دی اور قائد تحریک جناب الطاف حسین کی جانب سے پھولوں کی چاڈر چڑھائی اور فاتحہ خوانی کی ۔