حیسکو کیجانب سے طویل غیر اعلانیہ لوڈشیڈنگ نے عوام کی زندگی اجیرن کر دی ہے ،سید وسیم حسین ،رکن قومی اسمبلی

حیدرآباد۔۔۔ 27 ،جولائی ،2014 ء

حق پرست رکن قومی اسمبلی سیدوسیم حسین نے کہاہے حیسکو کیجانب سے ماہِ صیام کے دوران طویل غیر اعلانیہ لوڈشیڈنگ نے حیدرآبادکے عوام کی زندگی اجیرن کر دی ہے۔ سید وسیم حسین نے حیدرآباد میں جاری غیر اعلانیہ لوڈشیڈنگ سے شہریوں اور تاجر برادری کو درپیش مشکلات پر تشویش کا اظہار کرتے ہوئے کہا کہ شہر کے مختلف علاقوں میں بجلی کی لائنوں میں شارٹ سرکٹ ، بجلی کے پولز پر شارٹ سرکٹ اور ٹرانسفارمرزکی خرابی کی شکایات پر حیسکو عملے کے بروقت نہ پہنچنے سے شہر یوں کوروزے کی حالات میں 48،48 گھنٹے تک بجلی کے بغیر زندگی بسر کرنی پڑ رہی ہے ۔ انہوں نے کہا کہ غیر اعلانیہ لوڈ شیڈنگ کے باعث پانی کا بحران بھی پیدا ہو گیا ہے جوعوام کی مشکلات میں مزید اضافہ کر رہا ہے اورانہیں وضو اورغسل کے لئے شدیدپریشانیوں کاسامناکرناپڑرہاہے۔انہوں نے کہا کہ حیسکو کی جانب سے غیر اعلانیہ لوڈشیڈنگ کی وجہ سے حیدرآباد کی معیشت کو بھی شدید نقصان پہنچ رہا ہے ،شہریوں کو عیدالفطرکی خریداری میں شدیدمشکلات درپیش ہیں جبکہ غیر اعلانیہ لوڈ شیڈنگ کے باعث خصوصاً شہر میں قائم چھوٹی کاروباری صنعتوں میں روزانہ کی بنیاد پر کام کرنے والے مزدور وں کا روز گار تقریباً ختم ہو چکا ہے جس کی وجہ سے مزدور طبقے کے افراد اپنے گھرانوں کے ساتھ عید کی خوشیاں بھی نہیں منا سکیں گے۔انہوں نے وزیر اعظم پاکستان میاں نواز شریف ،وزیر پانی و بجلی عابد شیر علی اور حیسکو کے اعلیٰ افسران سے مطالبہ کیا کہ حیدرآباد میں غیر اعلانیہ لوڈ شیڈنگ کو فی الفور ختم کیا جائے ۔