ایم کیوایم کے زیر اہتمام گلشن اقبال ، لائنز ایریا اور سرجانی میں الگ الگ افطار ڈنر کاانعقاد

کراچی ۔۔۔18جولائی2014ء

متحد ہ قومی موومنٹ کے مختلف سیکٹرز کے زیر اہتمام شہر کے مختلف علاقوں میں رمضان المبارک کی مناسبت سے افطار ڈنر کا سلسلہ جاری ہے ۔اس سلسلے میں ایم کیو ایم گلشن اقبال سیکٹر ، لائنز ایریا سیکٹر اور سرجانی سیکٹر کے زیر اہتمام الگ الگ افطار ڈنر کا اہتمام کیا گیا جس میں ایم کیو ایم رابطہ کمیٹی کے اراکین سید امین الحق ، عادل صدیقی،توصیف خانزادہ اور خالد سلطان ،سینیٹر مولانا تنویر الحق تھانوی حق پرست اراکین اسمبلی عبدالوسیم ، عبداللہ،ارشد وہرہ ، علی رضا عابدی ،مزمل قریشی ، عدنان احمد مختلف شعبہ ہائے زندگی سے تعلق رکھنے والی معروف شخصیات، سیکٹر و یونٹ کے ذمہ داران ، کارکنان سمیت خواتین ، بچوں ، بزرگوں کی بڑی تعداد نے شرکت کی ۔ مختلف سیکٹرز کے زیر اہتمام ہونے والے افطار ڈنر میں روزہ داروں کی سہولت کے لئے افطار کے بہترین انتظامات کئے گئے تھے ۔ مختلف افطار ڈنرز سے خطاب کرتے ہوئے ایم کیو ایم رابطہ کمیٹی کے اراکین نے کہا کہ ایم کیو ایم ایک روایت شکن جماعت ہے جو ملک سے فرسودہ ، جاگیر دارانہ ، موروثی سیاسی نظا م کے خاتمے کی جدو جہد کر رہی ہے تاکہ پاکستان کو حقیقی لحاظ سے قائد اعظم محمد علی جناح ؒ کا پاکستان بنایا جاسکے جہاں ہر مذہب، زبان ، علاقے ،طبقے سے تعلق رکھنے والے افراد کو زندگی جینے کے مساوی حقوق حاصل ہوں اور ملک میں امن و محبت کی فضاء قائم ہوسکے ۔ اراکین رابطہ کمیٹی نے کہا کہ جناب الطاف حسین نے اپنی سیاسی جدوجہد کے آغاز سے ہی انسانیت کی خدمت کی ہے اور اپنے کارکنان کو بھی سیاست برائے خدمت کا درس دیا ہے یہی وجہ ہے کہ حق پرست اراکین قومی و صوبائی اسمبلی بھی اپنے اپنے علاقوں کے عوام کی بلا امتیا ز خدمت کرتے ہیں اور ملک کو انتہا پسندی و منافقت سے پاک کرنے کیلئے دن رات کوشاں ہیں ۔ افطار ڈنر کے شرکاء نے ایم کیو ایم کی جانب سے افطار ڈنر کے انعقاد کو سراہتے ہوئے جناب الطاف حسین سے اظہار تشکرکیا۔