کے الیکٹرک کی جانب سے کراچی کے مختلف علاقوں میں سحری اورافطاری کے دوران غیراعلانیہ لوڈشیڈنگ پررابطہ کمیٹی کااظہارمذمت

کراچی ۔۔۔17 جولائی 2014ء 

متحدہ قومی موومنٹ کی رابطہ کمیٹی نے کے الیکٹرک کی جانب سے کراچی کے مختلف علاقوں میں طویل دورانیہ لوڈشیڈنگ خصوصاًسحری اورافطاری کے دوران غیراعلانیہ لوڈشیڈنگ کی شدیدالفاظ میں مذمت کی ہے اوراسے کراچی کے عوام پر سراسرظلم اوران کے ساتھ ناانصافی قراردیاہے۔ایک بیان میں رابطہ کمیٹی نے کہاکہ کے الیکٹرک کی جانب سے مسلسل دعویٰ کیے جارہے تھے کہ ماہ رمضان المبارک میں خصوصاًسحری اورافطاری کے دوران کسی صورت لوڈشیڈنگ نہیں کی جائیگی تاہم کے الیکٹرک کے تمام تردعوؤں کے باوجودکراچی کے مختلف علاقوں میں سحری افطاری کے دوران لوڈشیڈنگ کاسلسلہ جارہی ہے جس کے باعث نہ صرف روزے داروں کوشدیدمشکلات اورپریشانیوں کاسامناہے بلکہ ان کی تراوی کی عبادت بھی شدیدمتاثرہورہی ہے ۔رابطہ کمیٹی نے کہاکہ کراچی کے شہری مہنگی ترین بجلی استعمال کررہے ہیں جوباقاعدگی سے ہرماہ بھاری مالیت کے بجلی کے اضافی بل بھی جمع کررہے ہیں ایسے میں انہیں سحری اورافطاری کے دوران طویل غیراعلانیہ لوڈشیڈنگ کے عذاب میں مبتلاکرناسراسرظلم ہے جس کی جتنی بھی مذمت کی جائے کم ہے۔رابطہ کمیٹی نے گورنرسندھ ڈاکٹرعشرت العباداوروزیراعلیٰ سندھ سیدقائم علی شاہ سے مطالبہ کیاکہ کراچی کے مختلف علاقوں میں سحری اورافطاری کے دوران غیراعلانیہ طویل لوڈشیڈنگ کانوٹس لیاجائے اورکے الیکٹرک کوکراچی کے شہریوں پرلوڈشیڈنگ کے عذاب سے بازرکھاجائے۔