متحدہ قومی موومنٹ کے پارلیمانی وفدکی وزیراعظم پاکستان میاں محمدنوازشریف سے گورنرہاؤس میں ملاقات

کراچی ۔۔۔۔10جولائی 2014ء

متحدہ قومی موومنٹ کی رابطہ کمیٹی کے ڈپٹی کنوینرڈاکٹرخالدمقبول ،ارکان رابطہ کمیٹی ڈاکٹرمحمدفاروق ستاراورسینیٹربابرخان غوری پرمشتمل ایم کیوایم کے تین رکنی پارلیمانی وفدنے جمعرات کے روزوزیراعظم پاکستان میاں محمدنوازشریف سے گورنرہاؤس کراچی میں ملاقات کی۔ملاقات انتہائی خوشگوارماحول میں ہوئی جس میں ایم کیوایم کے وفدنے وزیراعظم میاں محمدنوازشریف کوکراچی کے مسائل سے آگاہی فراہم کی اس موقع پرگورنرسندھ ڈاکٹرعشرت العباداوردیگربھی موجودتھے۔تفصیلات کے مطابق ڈاکٹرخالدمقبول صدیقی، ڈاکٹر محمد فاروق ستاراوربابرخان ٖغوری نے وزیراعظم میاں امحمدنواز شریف سے گورنرہاؤس کراچی میں ملاقات کی اور وزیراعظم کے سامنے شہرِکراچی اوراس کے عوام کودرپیش مسائل رکھے۔وفدنے حق پرست نمائندوں کی جانب سے پیش کردہ منصوبے K-4،کراچی ماس ٹرانزٹ،لیاری ایکسپریس وے اورکراچی کی بندرگاہوں کوM-9موٹروے سے ملانے کے لئے سدرن بائی پاس کامنصوبہ سمیت دیگرمنصوبے وزیراعظم کے سامنے رکھے ۔ اس موقع پروزیراعظم میاں محمدنوازشریف نے فراہمی آب کے منصوبےK-4جس کے پہلے مرحلے میں 260-MGDکی اضافی پانی کی فراہمی شامل ہے منظورکرلیا ،وزیراعظم نے کراچی ماس ٹرانزٹ کے پہلے مرحلے 14ارب روپے کی لاگت سے گرین لائن میٹروبس کی منظوری کابھی اعلان کیا،اس موقع پروزیراعظم نے لیاری ایکسپریس وے کی تکمیل کے لئے 7ارب روپے کی منظوری بھی دی تاکہ لیاری ایکسپریس وے کاوہ پانچ کلومیٹرکاوہ حصہ جوبننے سے رہ گیاتھااس فوری طورپرمکمل کیاجاسکے۔وزیراعظم نوازشریف نے ملیر ایکسپریس وے یعنی سدرن بائی پاس کے ذریعے کراچی کوبندگاہوں کوM-9موٹروے سے ملانے کے لئے 42ارب کی لاگت سے 67کلومیٹرسڑک کی تعمیربھی منظوری دیدی ہے۔وزیر اعظم میاں محمد نواز شریف نے ایم کیوایم کے منصوبوں پردلچسپی کااظہارکیا اور کراچی سرکلر ریلوے ،حیدرآباد میں یونیورسٹی کے قیام اورسکھرنوابشاہ اورلاڑکانہ سمیت دیگر شہروں میں اہم ترقیاتی منصوبوں پر آئندہ دورے پربھاری پیکیج منظورکرنے کی یقین دہانی کرائی۔ اس موقع پروفدکے ارکان نے منصوبوں کی منظوری اورفنڈزجاری کرنے کے اعلان کا خیر مقدم کرتے ہوئے وزیراعظم میاں محمدنواز شریف کاشکریہ داکیا۔