جناب الطاف حسین واحد قومی رہنما ہیں جنہوں نے برسوں قبل طالبانائزیشن کے ذریعے پاکستان کو لا حق سنگین خدشات سے حکمرانوں کوآگاہ کردیا تھا، صوبائی وزیرِ صنعت و تجارت رؤف صدیقی

مورخہ 2 جولائی 2014

صوبائی وزیرِ صنعت و تجارت رؤف صدیقی نے کہا ہے کہ قائدِ تحریک جناب الطاف حسین واحدقومی رہنما ہیں جنہوں نے برسوں قبل نہ صرف طالبانائزیشن کے ذریعے پاکستان کی نظریاتی اور جغرافیائی سرحدوں کو لا حق سنگین خدشات کا اظہار کیا تھا بلکہ عملی طور پر نشاندہی بھی کی اور حکمرانوں کو ان سنگین خدشات سے آگاہ بھی کرتے رہے ہیں جن سے آج پورے ملک کے عوام اور قومی ادارے انتہائی شدید مشکلات کا شکار ہیں۔ان خیالات کا اظہار صوبائی وزیرِ صنعت و تجارت رؤف صدیقی نے صنعتکاروں، فنکاروں اور دیگر مختلف وفود سے گفتگو کرتے ہوئے کیا۔انہوں نے افسوس کااظہار کرتے ہوئے کہا کہ کاش برسوں قبل قائدِ تحریک جناب الطاف حسین کے خدشات پر کارروائی ہو جاتی تونہ صرف پاکستان کے ہزاروں بے گناہ معصوم لوگوں کی جانیں بچ جاتیں بلکہ نہ ملک تباہی کے اس دہانے پر پہنچتا اورنہ ہی اسلام کا پرامن تشخص مجروح ہوتا۔ رؤف صدیقی نے مزید کہا کہ پاکستان کی مسلح افواج مملکتِ خداداد کی بقا و سلامتی اور خصوصاً اسلام کی سربلندی کیلئے ماہِ رمضان میں محاذپردہشت گردوں کے ساتھ جنگ کر رہی ہیں۔ اس موقع پر پاکستانیوں کو بھرپور عزم اور حوصلے کا اظہار کرنا چاہیے۔ ہر پاکستانی کوبلا تفریق رنگ و نسل مذہب و فرقہ پاک فوج کے ہاتھ مضبوط کرنا چاہئیں انہوں نے کہا کہ رمضان المبارک میں افواجِ پاکستان کی کامیابی و کامرانی کیلئے دعا کو اپنی عبادت کا ضروری حصہ بنا لینا چاہیے۔ قائدِ تحریک جناب الطاف حسین کی جانب سے 6 جولائی کو افواجِ پاکستان سے اظہارِ یکجہتی کے جلسہ میں مختلف شعبہ ہائے زندگی سے تعلق رکھنے والے امیر و غریب افراداور مختلف مسالک و مذاہب سے تعلق رکھنے والے لوگوں کی بڑی تعداد شریک ہوگی اورپوری قوم فوج کے شہیدوں کو سلامِ عقیدت اور غازیوں کو خراجِ تحسین پیش کرے گی۔