شمالی وزیرستان کے آئی ڈی پیز کی امداد کے لئے خدمت خلق فاؤنڈیشن کے مرکزی دفتر میں امدادی کیمپ قائم کردیا گیا
ایم کیوایم رابطہ کمیٹی نے مرکزی امدادی کیمپ کا دورہ کیا اور امدادی سرگرمیوں کا جائزہ لیا
الطاف حسین نے ہمیشہ ملک کے مظلوم و غریب طبقے کے عوام کی خدمت کی ہے، ایم کیو ایم رابطہ کمیٹی
شمالی وزیرستان میں جاری آپریشن کے دوران نقل مکانی کرنے والے اپنے ہم وطنوں کی مدد میں کوئی کسر نہ چھوڑیں
ایم کیو ایم رابطہ کمیٹی کی کے کے ایف کے رضاکاران کو ہدایت
کراچی ۔۔۔24جون2014ء
متحدہ قومی موومنٹ کے قائد الطاف حسین کی ہدایت پر شمالی وزیرستان سے نقل مکانی کرنیوا لے آئی ڈی پیز کی امداد کے لئے خدمت خلق فاؤنڈیشن کے مرکزی دفتر واقع فیڈرل بی ایریا میں مرکزی امدادی کیمپ قائم کردیا گیا ہے ۔ایم کیوایم رابطہ کمیٹی کے اراکین سیف یار خان ، شاکر علی ، کہف الوریٰ اور حق پرست رکن قومی اسمبلی نبیل گبول نے مرکزی کیمپ کا دور ہ کیا اور امدادی سرگرمیوں کا جائزہ لیا ۔ اس موقع پر رابطہ کمیٹی ارکان نے خدمت خلق فاؤنڈیشن کے رضاکاروں سے گفتگو کرتے ہوئے کہا کہ قائد تحریک الطاف حسین نے اپنی جدو جہد کے آغاز سے ہی ملک کے مظلوم و غریب طبقے کے عوام کی خدمت کی ہے اور ملک میں کسی بھی ناگہانی یا قدرتی آفت کے نتیجے میں متاثرہ عوام کی بھر پور امداد اور خدمت کا درس دیا ہے ۔ رابطہ کمیٹی ارکان نے خدمت خلق فاؤنڈیشن کے رضاکاروں اور آئی ڈی پیز کے لئے قائم امدادی کیمپ پر مامور ایم کیوایم کے کارکنان کو جناب الطاف حسین کا پیغام پہنچاتے ہوئے کہاکہ وہ شمالی وزیرستان میں دہشتگردوں کے خلا ف جاری آپریشن ضرب عضب کے دوران نقل مکانی کرنے والے اپنے ہم وطنوں کی مدد میں کوئی کسر نہ چھوڑیں اور آئی ڈی پیز کی ہر ممکن امداد کریں تاکہ دہشتگردی کے خلا ف جنگ میں اپنے سکھ چین کی قربانی دینے والے ہم وطنوں کی پریشانیوں اور تکا لیف کو کم کیا جاسکے۔