پاکستان عوامی تحریک کے رہنما عمرریاض عباسی ،دیگررہنماؤں اورکارکنوں کی گرفتاریاں کھلاظلم ہے۔ندیم نصرت،سینئرڈپٹی کنوینر ایم کیوایم

لندن۔۔۔22 جون 2014ء

متحدہ قومی موومنٹ کی رابطہ کمیٹی کے سینئرڈپٹی کنوینرندیم نصرت نے پاکستان عوامی تحریک کے مرکزی رہنما عمرریاض عباسی اوردیگررہنماؤں کی گرفتاریوں کی شدیدمذمت کی ہے ۔ اپنے بیان میں ندیم نصرت نے کہاکہ سانحہ 17جون کے ذمہ داروں کے خلاف کارروائی کرنے کے بجائے موجودہ حکومت نے جس طرح اسلام آبادسمیت پنجاب بھرمیں پاکستان عوامی تحریک کے رہنماؤں اورکارکنوں کی اندھادھند گرفتاریوں کاسلسلہ شروع کردیاہے،ان کے قافلوں کو طاقت کے ذریعے روکاجارہاہے، اسلام آبادایئرپورٹ اوراس سے ملحقہ علاقوں کوسیل کردیاگیاہے اوراسلام آبادشہر میں موبائل فون سروس بھی معطل کی جارہی ہے وہ جمہوریت اورعوام کے جمہوری حقوق کی دھجیاں اڑانے کے مترادف ہے۔ندیم نصرت نے کہا کہ جلسے ،جلوس ، مظاہرے اورریلیاں منعقد کرنا ہرسیاسی یامذہبی جماعت کاآئینی، قانونی اورجمہوری حق ہے لیکن حکومت پاکستان عوامی تحریک کے کارکنوں کواپنے قائدکے استقبال سے روکنے کیلئے جس طرح حکومتی طاقت کابیجااستعمال کررہی ہے اورطاقت کے ذریعے انہیں کچلنے کیلئے جوظالمانہ اقدامات کررہی ہے وہ انتہائی قابل مذمت اورآمرانہ ہیں ۔ ندیم نصرت نے مطالبہ کیاکہ پاکستان عوامی تحریک کے رہنما عمرریاض عباسی اوردیگر رہنماؤں اورکارکنوں کوفی الفوررہاکیاجائے اور پاکستان عوامی تحریک کوریاستی طاقت کے ذریعے کچلنے اورانتقامی کارروائیوں کانشانہ بنانے کاسلسلہ بند کیاجائے ۔