کشمیر کے عوام طاہرہ آصف کے اہل خانہ اور ایم کیوا یم کے غم میں برابر شریک اور افسوس ناک واقعے پر آبدیدہ ہیں، چوہدری عبد المجید

لاہور ۔۔۔21جون2014ء 

متحدہ قومی موومنٹ کی شہید خاتون رکن قومی اسمبلی طاہر ہ آصف کے فاتحہ سوئم میں صدر آزاد کشمیر سردار محمد یعقوب اور وزیر اعظم آزاد کشمیر چوہدری عبدالمجیدنے شرکت کی اور کشمیری عوام کی جانب سے قائد تحریک الطاف حسین، طاہرہ آصف شہید کے اہل خانہ او ر ایم کیو ایم کے کارکنان سے اظہار تعزیت کیا ۔اس موقع پر سردار محمد یعقوب نے سوگوار ان سے گفتگو کرتے ہوئے کہا کہ طاہرہ آصف صرف رکن قومی اسمبلی نہیں تھیں بلکہ اس قوم کی بہن بھی تھیں انکے بہیمانہ قتل کی جتنی بھی مذمت کی جائے وہ کم ہے ۔انھوں نے کہا کہ پاکستان کو موجود ہ حا لات میں شدید مشکلات اور مصائب کا سامناہے اور ایسے حالا ت میں ملک رکن قومی اسمبلی طاہرہ آصف کے قتل جیسے شرمناک واقعات کا متحمل نہیں ہوسکتا ۔ سردار یعقوب نے کہا کہ پنجاب ملک کا سب سے بڑا صوبہ اور لاہو ر اہم شہر ہے اور لاہور جیسے شہر میں خاتون رکن اسمبلی کا درد ناک قتل صوبائی حکومت کے گڈ گورننس کے دعوؤں پر سوالیہ نشان ہے جس پر پوری قوم کو تشویش ہے ۔ اس موقع پر وزیر اعظم آزاد کشمیر چوہدری عبدالمجید نے طاہرہ آصف شہید کے اہل خانہ سے اظہار تعزیت کیا اور کہا کہ کشمیر کے عوام محترمہ طاہرہ آصف کے اہل خانہ اور ایم کیوا یم کے تمام کارکنان کے غم میں برابر کے شریک ہیں اور اس افسوس ناک واقعے پر آبدیدہ ہیں ۔ اس موقع پر صدر آزاد کشمیر سردار محمد یعقوب اور وزیر اعظم چوہدری عبد المجیدنے حکومت سے مطالبہ کیا کہ وہ طاہرہ آصف شہید کے قتل میں ملوث عناصر اور انکے سرغنوں کو گرفتار کرکے قانون کے کٹہرے میں لائیں اور طاہرہ آصف کے قتل کے پیچھے چھپی مذموم سازش کو بے نقاب کریں ۔