الطاف حسین کا گڈانی کے ساحل پرماہی گیروں کے ڈوب کر جاں بحق ہونے کے واقعے پر اظہار افسوس

لندن ۔۔۔۔16جون2014ء

متحدہ قومی موومنٹ کے قائد الطاف حسین نے گڈانی کے ساحل پرماہی گیروں کے ڈوب کر جاں بحق ہونے کے واقعے پر گہرے دکھ اور افسوس کا اظہار کرتے ہوئے کہا ہے کہ ملک میں سمندری سطح بلند ہے جس کے باعث متعدد ساحلی مقامات پر طغیانی کے خطرا ت بھی موجود ہیں۔قائد تحریک الطاف حسین نے جاں بحق ماہی گیروں کے بلند درجات کے لئے دعا کرتے ہوئے ملک کے ساحلی علاقوں کے عوام بالخصوص ماہی گیروں سے اپیل کی ہے کہ وہ احتیا ط سے کا م لیتے ہوئے گہرے سمندر میں جانے سے گریز کریں اور اپنے اہل خانہ، رشتہ داروں ، دوست احباب کو بھی موسم کی خراب صورتحال سے آگاہ رکھیں تاکہ جان و مال کے نقصان سے بچا جاسکے ۔قائد تحریک الطاف حسین نے صوبائی و وفاقی حکومتوں اور متعلقہ شعبے کے وزراء اور انتظامیہ سے مطالبہ کیا ہے کہ وہ سمندر کی بلند سطح کو مد نظر رکھتے ہوئے ساحلی علاقوں پر خصوصی حفاظتی انتظامات کریں،ساحلی علاقوں کے عوام بالخصوص ماہی گیر برادری کو سمندر کی صورتحال سے آگہی فراہم کریں اور عوام کی جان و مال کا تحفظ یقینی بنانے کیلئے ہر ممکن اقدامات کریں ۔