سابق صدر جنرل پرویز مشرف سے قائد تحریک الطاف حسین کی ٹیلی فون پر گفتگو

شدید گرمی میں کراچی سمیت درجنوں مقامات پر جمع ہوکر آپ سے یکجہتی کامظاہرہ کیا اس کی جس قدر تعریف کی جائے وہ کم ہے، جنرل پرویزمشرف

لندن۔۔۔12، جون2014ء

متحدہ قومی موومنٹ کے قائد جناب الطاف حسین نے جمعرات کی شام کراچی فون کرکے سابق صدر جنرل پرویز مشرف کو ایگزٹ کنٹرول لسٹ سے ان کا نام نکالے جانے کے عدالتی فیصلہ پر مبارکباد پیش کی ۔ جناب الطاف حسین نے کہاکہ عدالت کا یہ فیصلہ حق کی فتح ہے اور آپ کے وکلاء کی ٹیم نے جس دلجمعی سے آپ کا مقدمہ لڑا ہے اس پر وہ زبردست خراج تحسین کی مستحق ہے۔ انہوں نے جنرل پرویز مشرف سے کہاکہ آپ کی والدہ کی علالت کی اطلاعات پر مجھے سخت تشویش ہے ، میری دعا ہے کہ اللہ تعالیٰ انہیں صحت دے اور جلد سے جلد آپ کی ان سے ملاقات ہو۔ سابق صدر نے جناب الطاف حسین کا شکریہ ادا کرتے ہوئے کہاکہ اصولوں اور حق وسچ کی بنیاد پر جس طرح آپ نے اور آپ کی جماعت نے مجھے انصاف دلوانے کیلئے آواز بلند کی ہے اس پر میں آپ کا شکرگزار ہوں۔ جنرل پرویز مشرف نے جناب الطا ف حسین سے کہاکہ لندن میں آپ کی حراست پر آپ نے اورآپ کی جماعت نے جس طرح صبروتحمل کا مظاہرہ کرکے امن قائم رکھا اور شدید گرمی میں کراچی سمیت درجنوں مقامات پر جمع ہوکر آپ سے یکجہتی کامظاہرہ کیا اس کی جس قدر تعریف کی جائے وہ کم ہے۔