اہم قومی تنصیبات کے تحفظ کیلئے قومی سلامتی کے حساس اداروں کو خصوصی اختیارات دیئے جائیں قائد ایم کیوایم الطاف حسین

لندن۔۔۔10، جون2014ء

متحدہ قومی موومنٹ کے قائد جناب الطاف حسین نے کراچی ائیرپورٹ سے ملحقہ ا ے ایس ایف ٹریننگ کیمپ پر دہشت گردوں کے حملے کی شدید الفاظ میں مذمت کرتے ہوئے وفاقی اور صوبائی حکومتوں سے اپیل کی ہے کہ اہم قومی تنصیبات کے تحفظ کیلئے قانون نافذ کرنے والے اداروں اور قومی سلامتی کے حساس اداروں کو خصوصی اختیارات دیئے جائیں ۔

ایک بیان میں جناب الطاف حسین نے کہا کہ پاکستان کا معاشی حب کراچی اس وقت دہشت گردوں کی زد پر ہے ۔ انہوں نے وزیراعظم پاکستان میاں نوا ز شریف سے مطالبہ کیا کہ دہشت گردی کے مکمل خاتمہ کیلئے سخت ایکشن کا اعلان کیا جائے ، ہنگامی بنیادوں پر مسلح افواج ، سیکوریٹی ایجنسیوں اور پیراملٹری کے اداروں کے سربراہان کا اجلاس بلاکر کراچی اور اہم قومی تنصیبات کو محفوظ بنانے اور دہشت گردوں کے خاتمے کیلئے حکمت عملی ترتیب دی جائے اور اس پر جلد ازجلد عملدرآمد کیا جائے ۔ جناب الطاف حسین نے کہاکہ رینجرز، پولیس اور اے ایس ایف کے بہادر جوان جس طرح دہشت گردوں کا بہادری سے مقابلہ کررہے ہیں اس پر وہ زبردست خراج تحسین کے مستحق ہیں اور میری دعا ہے کہ اللہ تعالیٰ قوم کے ان بہادربیٹوں کی مدد فرمائے ۔ جناب الطاف حسین نے کراچی کے شہریوں خصوصاً کاروباری حضرات، تاجروں اور دکانداروں سے اپیل کی کہ وہ شہر کی سنگین اور نازک صورتحال میں لمحہ بہ لمحہ چوکس رہیں اوراپنی زندگیوں کے تحفظ کواولیت دیں۔