فوری طور پر ریسکو انتظامات کو بہتر بنانے اور گمشدہ لوگوں کی تلاش میں کو ئی کسر نہ چھوڑی جائے، الطاف حسین

میں نے 2005ء میں کشمیر میں آنے والے زلزلہ کے وقت بھی کہاتھا کہ ڈیزاسٹر مینجمنٹ سیل بنایا جائے

لندن۔۔۔9جون 2014ء

ایم کیوایم کی رابطہ کمیٹی کراچی و لندن کا مشترکہ اجلاس منعقد ہوا ۔ اجلاس کی صدرات قائدتحریک جناب الطاف حسین نے کی ۔ اجلا س سے خطاب کر تے ہوئے انہوں نے کراچی ائیر پورٹ کے واقعہ پر شدید افسوس کااظہار کیا اورکہاکہ فوری طور پر ریسکیو انتظامات کو بہتر بنانے اور گمشدہ لوگوں کی تلاش میں کو ئی کسر نہ چھوڑی جائے۔ جناب الطاف حسین نے کہاکہ میں نے 2005ء میں کشمیر میں آنے والے زلزلہ کے وقت بھی کہاتھا کہ ڈیزاسٹر مینجمنٹ سیل بنایا جائے،اسے جدید تقاضوں سے ہم آہنگ کیاجائے اور اس میں تربیت یافتہ افراد کو شامل کیا جائے تاکہ وہ صحیح انداز میں لوگوں کی مدد کر سکیں۔ انہوں نے کہا کہ گو کہ وفاقی اور صوبائی سطح پر این ڈی ایم اے اور پی ڈی ایم اے یعنی نیشنل ڈیزاسٹر مینجمنٹ اتھارٹی اورپروونشل ڈیزاسٹر مینجمنٹ اتھارٹی کا قیام عمل میں لایا گیا اور اربوں روپے کے بجٹ بھی مختص کئے گئے مگر کسی بھی ناگہانی آفت یا دہشت گردی کے واقعہ پر ان دونوں اداروں کا کوئی کردار دیکھنے میں نہیں آیا ۔ جناب الطاف حسین نے کہا کہ ایک ایسے موقع پر کہ جب ہم انتہائی تربیت یافتہ اور جدید ترین ہتھیاروں سے لیس دہشت گردوں کے خلاف ملک گیر سطح پر آپریشن کرنے کا مطالبہ کررہے ہیں ایسی صورتحال میں پی ڈی ایم اے اور این ڈی ایم اے کا رول انتہائی اہم ہوگا لہٰذا ضرورت اس امر کی ہے کہ پی ڈی ایم اے اور این ڈی ایم اے کو جدید خطوط پر استوار کرتے ہوئے دفتروں اور کاغذوں سے نکال کر عملی شکل میں لایا جائے ۔جناب الطا ف حسین نے ایم کیوایم کی رابطہ کمیٹی کے اراکین و کارکنان کو ہدایت کی کہ وہ امدادی سرگرمیوں بڑ ھ چڑھ کر حصہ لیں ، زخمیوں کی اہسپتال جاکر عیادت کریں اور کے کے ایف رضا کاران ہنگامی حالات کے لئے اپنے آپ کوہر وقت تیار رکھیں۔