ذہنی و جسمانی لحاظ سے صحت مند افراد اپنی قوم کا قیمتی اثاثہ ہوتے ہیں، الطاف حسین

لندن ۔۔۔31مئی2014ء

متحدہ قومی موومنٹ کے قائد الطاف حسین نے کہاہے کہ کسی بھی معاشرے کی تہذیبی،ثقافتی اور نظریاتی ترقی کا دارومدار اس معاشرے کے نوجوانوں پر ہوتا ہے اور جن معاشروں میں نوجوانوں کی صحت، فلاح اور ترقی کو اہمیت دی جاتی ہے وہ قومیں دنیا میں کامیاب ہوتی ہیں اور ایسی قوموں کو تاریخ ہمیشہ سنہرے الفاظ میں یاد رکھتی ہے ۔عالمی یوم انسداد تمباکونوشی کے موقع پر خصوصی پیغام میں جناب الطاف حسین نے ملک کے نوجوانوں کو مخاطب کرتے ہوئے کہا ہے کہ ہمارا وطن حالیہ دور میں انتہائی مشکلات اور مسائل سے دوچار ہے او ر قوم کو مٹانے کیلئے چاروں اطراف سے سازشیں کی جا رہی ہیں ایسے میں مجھے قوم کے باشعور و صحت مند نوجوانوں سے امید ہے کہ وہ قوم کو اس بھنور سے نکالنے میں اپنا کردار ادا کریں گے ۔ جناب الطاف حسین نے کہا کہ تمباکو نوشی انسا نی صحت کے لیے انتہائی مضر اور زہر قاتل ہے مگر بد قسمتی سے ہمارے ملک میں تمباکو نوشی کو مہذب سمجھا جانے لگا ہے اوراس لعنت کو تہذیب کا حصہ بنانے کی کوششیں کی جارہی ہیں قوم کا ہر طبقہ بالخصوص نوجوان طلباء میں تمباکو نوشی کا بڑھتا ہوا تناسب میرے لئے تشویش کا باعث ہے ۔ جناب الطا ف حسین نے ملک بھر کے عوام بالخصوص قوم کے نوجوانوں سے اپیل کی ہے کہ وہ تمباکو نوشی کا لعنت کو فوری طور پرترک کرکے ایک صحت مند شہری کی حیثیت سے اپنی قوم کو موجودہ مسائل اور سازشوں کے بھنور سے نکالنے میں اپنا کردار ادا کریں اور نہ صرف خود بلکہ اپنے دوست احباب ، رشتہ داروں ، محلے کے افراد اور طالبعلموں کو بھی اس لعنت کو ترک کرنے کی تلقین کریں کیونکہ ذہنی و جسمانی لحاظ سے صحت مند افراد اپنی قوموں کا قیمتی اثاثہ ہوتے ہیں ۔