ایم کیو ایم رابطہ کمیٹی نے لاہور ہائی کورٹ کے باہر غیرت کے نام پرلاٹھیوں اور اینٹوں کے وار سے 25سالا حاملہ خاتون فرزانہ پروین کے بیہمانہ قتل کی شدید الفا ظ میں مذمت کی ہے

کراچی۔۔۔28مئی2014ء

متحدہ قومی موومنٹ کی رابطہ کمیٹی نے لاہور ہائی کورٹ کے باہر غیرت کے نام پر باپ اور بھائیوں کی جانب سے لاٹھیوں اور اینٹوں کے وار سے 25سالا حاملہ خاتون فرزانہ پروین کے بیہمانہ قتل کی شدید الفا ظ میں مذمت کی ہے ۔ رابطہ کمیٹی نے کہا کہ ملک بھر میں ہر سال سینکڑوں خواتین کو غیرت کے نام پرانکے اہل خانہ اور نام نہاد جرگوں کی جانب سے قتل کردیا جاتا ہے لیکن آج تک حکمرانوں کی جانب سے خواتین کے تحفظ اور اس قسم کے واقعات کی روک تھام کے لئے بناے گئے قوانین پر بھی عمل در آمد نہیں کیا جا رہا ہے ۔ ایم کیوایم رابطہ کمیٹی کے ارکان نے ہیومن رائٹس کمیشن آف پاکستان کی گزشتہ ماہ جاری ہونے والی انسانی حقوق کی خلاف ورزیوں پر مبنی رپورٹ کا حوالہ دیتے ہوئے کہاکہ گزشتہ برس ملک بھر میں تقریباً 869خواتین کو پسند کی شادی کرنے یا غیرت کے نام پر قتل کیا گیاہے لیکن منگل کے روز لاہو ر ہائی کورٹ کے باہر پسند کی شادی کرنے پر فرزانہ پروین کے انسانیت سوز قتل نے پاکستان سمیت دنیا بھر میں انسانی حقوق کے اداروں ، عوام بالخصوص خواتین کو شدید تشویش میں مبتلا کر دیا ہے اور فرزانہ پروین کا دن دہاڑے لاہور ہائی کورٹ کے باہر انسانیت سوز قتل دنیا بھر میں پاکستان کی بدنامی کا سبب بنا ہے ۔رابطہ کمیٹی نے ملک بھر کے نشریاتی اداروں بالخصوص الیکٹرانک میڈیا سے اپیل کی ہے کہ وہ ملک بھر میں خواتین کے ساتھ رواں رکھے جانے والے سلوک سے متعلق عوام میں شعور بیدار کریں تاکہ پاکستان کو خواتین سمیت تمام طبقات کے لیے پر امن ملک بنایا جاسکے۔ رابطہ کمیٹی نے وزیر اعظم پاکستان میاں محمد نواز شریف،وزیر اعلیٰ پنجاب شہباز شریف ، وزیر قانون رانا ثنا ء اللہ اور خواتین کے حقوق کے لیے کام کرنے والی مختلف ملکی و بین الاقوامی سماجی تنظیموں کے ذمہ داران سے مطالبہ کیا ہے کہ وہ لاہور ہائی کورٹ کے باہر پیش آنے والے اپنی نوعیت کے دہشت ناک واقعے کا نوٹس لیں اور حکومت پنجاب واقعے میں ملوث افراد اور ذمہ داران کو گرفتار کرکے انہیں قرار واقع سزا دیں اور خواتین سمیت ملک میں بسنے والے تما م طبقا ت کو جان و مال کا تحفظ فراہم کریں۔

*****