ایم کیو ایم کے شہید کارکن اشفاق قریشی کی نماز جنازہ و تدفین میں سیکڑوں کارکنا ن وذمہ داران کی شرکت

کراچی ۔۔۔۔26مئی 2014ء 

متحدہ قومی موومنٹ کے شہید کارکن محمد اشفاق قریشی کی نمازہ جنازہ مین کورنگی روڈ پر ادا کردی گئی ۔ نماز جنازہ میں ایم کیوایم رابطہ کمیٹی کے ارکان ڈاکٹر فارو ق ستار ، سیف یار خان ، عادل خان، میاں عتیق ، حق پرست رکن صوبائی اسمبلی وقار حسین شاہ ،ایم کیوایم کے مختلف سیکٹر اور یونٹس کے ذمہ داران ،کارکنا ن ، حق پرست عوام اور شہید کے اہل خانہ نے شرکت کی ۔نماز جنازہ کے موقع پر ڈاکٹر فاروق ستار نے میڈیا نمائندگان سے گفتگو کرتے ہوئے کہا کہ ایم کیو ایم کے بے گناہ کارکنان کو بلا جواز گرفتار کر کے ان پر بہیمانہ تشدد کیا جا رہا ہے اور انہیں ما ورائے آئین اور ماورائے عدالت قتل کرکے مسخ شدہ لاشوں کو کراچی کے مختلف علاقوں میں لاوارث پھینکا جا رہا ہے ۔فاروق ستار نے کہا کہ محمد اشفاق شہید کو ایم کیو ایم کے دیگر 3کارکنان کے ساتھ وردی میں ملبو س پولیس اہلکاروں نے 18مئی بروز اتوار کو حراست میں لیا تھا جس کے بعد دیگر 3ساتھیوں کو پیر کی شام بے انتہا تشدد کا نشانہ بنانے کے بعد کراچی کے کسی نا معلوم مقام پر چھوڑ دیا گیاتھااور اشفاق قریشی کو لا پتہ کر دیا گیا تھا ،انھوں نے کہا کہ اس تما م عرصے کے دوران ایم کیو ایم کی جانب سے ڈی جی رینجرز میجر جنرل رضوان اختر ، آئی جی سندھ اور تمام متعلقہ حکام سے با رہا اپیل کے باوجود ہما رے ایک اور ساتھی کو ماورائے عدالت قتل کردیا گیاجوکہ ایم کیو ایم کے تمام کارکنان اور ذمہ داران کے لیے قابل افسوس عمل ہے اور کارکنان کے غم و غصے میں اضافے کا سبب ہے ۔انھوں نے وزیر اعظم پاکستان میاں محمد نواز شریف ، وفاقی وزیر داخلہ چوہدری نثار علی خان ، گورنر سندھ ڈاکٹر عشرت العباد ، وزیر اعلیٰ سید قائم علی شاہ اور آئی جی سندھ پولیس سے مطالبہ کیا کہ و ہ اشفاق قریشی کو حراست میں لینے کے بعد انکے ما ورائے عدالت قتل میں ملوث اہلکاروں کا پتہ لگائیں اور انکے خلاف ایف آئی آر درج کرکے انہیں قانون کے کٹہرے میں لائیں ۔ بعد ازاں شہید اشفاق قریشی کی تدفین سینکڑوں آہوں اور سسکیوں کے درمیان ایم کیوایم کے شہدا ء قبرستا ن یاسین آباد میں کردی گئی ۔