دہشت گردی کی روک تھام کیلئے عوام، اپنی مدد آپ کے تحت گلی گلی اورمحلہ محلہ چوکیدار ی نظام قائم کریں، ایم کیوایم رابطہ کمیٹی کی اپیل

کراچی ۔۔۔23، مئی 2014ء

متحدہ قومی موومنٹ کی رابطہ کمیٹی نے عوام و کارکنان سے اپیل کی ہے کہ دہشت گردی کے بڑھتے ہوئے واقعات کی روک تھام کیلئے اپنی مدد آپ کے تحت گلی گلی اورمحلہ محلہ چوکیدار ی نظام قائم کریں اور ویجیلنس کمیٹیاں تشکیل دیکرعوام کی جان ومال کے تحفظ کیلئے قومی فریضہ انجام دیں۔ رابطہ کمیٹی نے کہا کہ پاکستان کو اندرونی وبیرونی خطرات لاحق ہیں اور ملک اس وقت انتہائی نازک دور سے گزررہا ہے اورمسلح افواج شمالی وزیرستان میں انتہاء پسند دہشتگردوں کے خلاف نبرد آزما ہوکرجانی قربانیاں پیش کررہی ہیں، دہشت گردوں کے خلاف جاری کارروائی کے باعث دہشت گردوں کی جانب سے دہشت گردی کی کارروائیوں کے خطرات بڑھ گئے ہیں۔ ان حالات میں قوم کے ایک ایک فرد پر لازم ہے کہ وہ اپنی ذمہ داری محسوس کرتے ہوئے دہشت گردی کے خاتمہ کیلئے پولیس،رینجرز اور سیکوریٹی فورسزکے ساتھ بھرپورتعاون کرے اور ملک وقوم کی سلامتی وبقاء کیلئے اپنا کردار ادا کرے ۔ رابطہ کمیٹی نے عوام سے پرزور اپیل کی کہ وہ دہشت گردی کے واقعات کی روک تھام کیلئے اپنے اپنے علاقوں میں بزرگوں اورنوجوانوں پر مشتمل محلہ کمیٹیاں بنائیں ، مشکوک افراد، مشکوک اشیاء پر کڑی نظررکھیں ، پویس اوررینجرز سمیت دیگر سیکوریٹی اداروں کے ایمرجنسی فون نمبر اپنے پاس رکھیں اور کسی بھی مشکوک فردیاسرگرمی کی اطلاع فوری طور پر مقامی پولیس یا دیگر سیکوریٹی اداروں کودیں۔ رابطہ کمیٹی نے حکومت اور قانون نافذ کرنے والے اداروں سے مطالبہ کیا کہ وہ وزیرستان سے نقل مکانی کرنے والوں کی سخت چیکنگ اور اسکیننگ کرے تاکہ نقل مکانی کرنے والوں کی آڑ میں دہشت گرد وں کی آمدورفت کوروکا جاسکے۔