دہشت گردی کے واقعات کی روک تھا م کیلئے عوام اپنی مدد آپ کے تحت حفاظتی انتظامات کیلئے علاقوں میں چوکیدار ی نظام کریں: الطاف حسین

لندن ۔۔21مئی 2014ء 

متحدہ قومی موومنٹ کے قائد جناب الطاف حسین نے عوام و کارکنان سے اپیل کی ہے کہ دہشت گردی کے بڑھتے ہوئے واقعات کی روک تھام کیلئے اپنی مدد آپ کے تحت علاقوں میں چوکیدار ی نظام قائم کریں اور ڈاکوؤں ، چوروں ،خود کش حملہ آوروں ،تخریب کاروں اور دہشت گردوں کی کسی بھی قسم کی کارروائی سے بچنے کیلئے فوری طورپر ویجیلنس کمیٹیاں تشکیل دیں ۔ اپنے بیان میں جناب الطاف حسین نے کہا کہ ملک اورامن کے دشمن دہشت گرد عنا صر ملک خصوصاً سندھ کے شہری علاقوں میں دہشت گردی کے ذریعے خوف کی فضا ء قائم کر نے کے مذموم مقاصد کے تحت بم دھماکے ،قتل وغارتگری اور دہشت گردی کی دیگر سنگین قسم کی وارداتیں کررہے ہیں اور سیکوریٹی اہلکاروں اور معصوم شہریوں کوخاک وخون میں نہلا رہے ہیں ۔انہوں نے کہاکہ دہشت گردی کے اس چیلنج سے نمٹنے کیلئے عوام بھی پولیس اورسیکوریٹی اداروں کے ساتھ بھرپورتعاون کریں ۔جناب الطاف حسین نے عوام سے اپیل کی کہ وہ دہشت گردی کے واقعات کی روک تھام کیلئے احتیاطی تدابیر اختیارکرتے ہوئے اپنے اپنے علاقوں میں بزرگوں اورنوجوانوں پر مشتمل محلہ کمیٹیاں بنائیں، دن رات ڈیوٹی کے فرائض انجام دیں اور کسی بھی مشکوک اشیاء ، یا علاقے میں آنے جانے والے افراد پر کڑی نظر رکھیں او راسکی اطلاع فوری طور پر مقامی پولیس یا دیگر سیکوریٹی اداروں کودیں ۔ انہوں نے کہا کہ محلہ کمیٹیاں اپنے پاس پویس ،رینجرز سمیت دیگر سیکوریٹی اداروں کے ایمرجنسی فون نمبر لازمی رکھیں تاکہ کسی بھی واقعہ ،مشکوک بیگ یا مشکوک افراد کی موجودگی کے بارے میں فوری طور پر قانون نافظ کرنے والے اداروں کو مطلع کیا جاسکے ۔