مولاناحسرت موہانی کاشماران عظیم ہستیوں میں ہوتاہے جو صدیوں میں پیداہوتی ہیں۔الطاف حسین

لندن۔۔۔13مئی 2014ء

متحدہ قومی موومنٹ کے قائد جناب الطاف حسین نے کہاہے کہ رئیس الاحرار مولاناحسرت موہانی کاشماران عظیم ہستیوں میں ہوتاہے جو کسی بھی قوم میں صدیوں میں پیداہوتے ہیں جواپنی زندگی کسی نیک مشن ومقصد، اورمظلوموں کے حقوق انصاف کے حصول اورلوگوں کوغلامی سے نجات کے لئے وقف کردیتے ہیں۔ برصغیرکی جدوجہدآزادی کے عظیم رہنمامولاناحسرت موہانی کی 63 ویں برسی پر اپنے ایک پیغا میں جناب الطاف حسین نے کہاکہ مولاناحسرت موہانی نے برصغیرکی آزادی کیلئے بے مثال جدوجہدکی وہ غلامی کوسخت ناپسند کرتے تھے اور قومی آزادی اورغیرت وحمیت پریقین رکھتے تھے، انہوں نے آزادی کی جدوجہد ہی کواپنی زندگی کامقصداولین بنالیا اوربرصغیرکی آزادی کیلئے عملی طورپرکوشاں رہنا ان کا اوڑھنا بچھونا تھا۔مولاناحسرت موہانی نے اپنی تحریروں، تقریروں اور شاعری کے ذریعے برصغیر کے لوگوں میں آزادی کیلئے جدوجہد کی حرارت پیدا کی ۔اس جدوجہد کی پاداش میں انہوں نے کئی بار قیدوبند کی صعوبتیں بھی برداشت کیں لیکن ظلم وجبرکے ہتھکنڈے انہیں حریت پسندی اور جدوجہدسے دستبردارنہیں کرسکے۔جناب الطاف حسین نے کہا کہ مولاناحسرت موہانی ایک جرات مند اوربے باک شخصیت تھے ،وہ سچ اورحق بات کااظہار بے باکی سے ہرجگہ کیا کرتے تھے ان کی یہ بے باکی مصلحت پسندلوگوں کوکبھی بھی پسند نہیں آئی جس کی وجہ سے انہیں غیروں ہی سے نہیں بلکہ اپنوں کی بھی ناراضگی ناپسندیدگی کا سامناکرناپڑا لیکن برصغیرکوآزادی ایسے ہی جرات منداوربے باک لوگوں کی جدوجہد اورقربانیوں کے طفیل حاصل ہوئی۔ انہوں نے کہا کہ زندہ اورباضمیرقومیں اپنے محسنوں کو کبھی فراموش نہیں کرتیں ،ہمیں چاہیے کہ ہم اپنی نئی نسل کو مولانا حسرت موہانی کی جدوجہداور قربانیوں سے آگاہ کریں۔ جناب الطاف حسین نے مولاناحسرت موہانی کوتمام حریت پسندوں اورحق پرستوں کی جانب سے زبردست خراج عقیدت پیش کیااور دعا کی کہ اللہ تعالیٰ مولاناحسرت موہانی کی قربانیوں کو قبول فرمائے اورہمیں ان کے جراتمندانہ کردار کی پیروی کرنے کی توفیق عطافرمائے ۔