ایم کیو ایم کے قائد جناب الطاف حسین کی میران شاہ میں غلام محمد روڈ پر سیکیورٹی فورسز کے قافلے کے نزدیک بم دھماکے کی مذمت

لندن ۔۔۔ 08مئی 2014ء

متحدہ قومی موومنٹ کے قائد الطاف حسین نے میر ان شاہ کے علاقے غلام محمد روڈ کے مقام پر سیکورٹی فورسز کے قافلے کے قریب سڑک کنارے نصب بم پھٹنے سے سیکورٹی فورسز کے 8اہلکاروں کی شہادت اور متعدد کے زخمی ہونے پر گہرے دکھ اور افسوس کا اظہارکیاہے ۔ایک بیان میں جناب الطاف حسین نے میران شاہ بم دھماکے کی سخت الفاظ میں مذمت کرتے ہوئے کہاکہ ایک جانب موجودہ حکومت دہشتگردوں سے مذاکرات اور ان سے جنگ بندی کے مطالبات کرنے میں مصروف ہے تو دوسری جانب سفاک دہشتگرد ملک کے سرحدی و نظریاتی محافظوں کو تواتر کے ساتھ نشانہ بنا رہے ہیں ۔جناب الطاف حسین نے کہا کہ حکومت دہشتگردوں سے مذاکرات کی باتیں کرنے کے بجائے ملک و قوم کی بقاء و سلامتی کے لیے سفاک و درندہ صفت دہشتگردوں کے خلاف منطقی کار روائی کرے ۔جنا ب الطاف حسین نے بم دھماکے میں شہید ہونے والے اہلکاروں کے لواحقین سے اظہار ہمدردی کرتے ہوئے شہداء کے بلند درجات اور زخمیوں کی جلد و مکمل صحتیابی کے لیے دعا کی ہے ۔ جناب الطاف حسین نے صدر پاکستان ممنون حسین ، وزیر اعظم میاں محمد نواز شریف ، وفاقی وزیر داخلہ چوہدری نثار علی خان اور وزیر اعلیٰ خیبر پختوخوا پرویز خٹک سے مطالبہ کیاہے کہ وہ دھماکے میں ملوث عناصر کو فی الفور گرفتار کر کے دہشتگردوں اور انکے آ لہ کاروں کے خلاف سخت کار روائی عمل میں لائیں ۔