نذیر حسین یونیورسٹی میں فن تعمیرات اورماحولیات ،انجینئرنگ ،بزنس اینڈایڈمنسٹریشن کی فیکلٹیز کاافتتاح، مستقبل میں یونیورسٹی میں مزید فیکلٹیز قائم کی جائیں گی

کراچی۔۔۔12 اپریل 2014ء

متحدہ قومی موومنٹ کے قائدجناب الطاف حسین نے کہاہے کہنذیر حسین یونیورسٹی انشاء اللہ تعلیم کا اعلیٰ معیار فراہم کرتے ہوئے جلد امتیازی مرکز بن جائے گی۔ آج نذیرحسین یونیورسٹی کی افتتاحی تقریب سے خطاب کرتے ہوئے انہوں نے یونیورسٹی کے شعبوں اور دیگر تفصیلات پرروشنی ڈالتے ہوئے کہاکہ نذیر حسین یونیورسٹی چارٹر انڈر گریجویٹ، ماسٹرز اور پی ایچ ڈی کی ڈگری فراہم کرتی ہے۔ یونیورسٹی میں وہ تمام طلبہ داخلے کے مستحق ہوں گے جو رنگ ،نسل، مذہب، جنس اور ہر طرح کی جسمانی معذوری سے بالاتر ہوکر کامیابی حاصل کرنے کی صلاحیت رکھتے ہیں۔ یونیورسٹی میں صرف میرٹ کی بنیاد پر ہی طالب علموں اور اساتذہ کی ٹیم کا انتخاب ہوگا۔ انہوں نے کہاکہ نذیر حسین یونیورسٹی کراچی میں طالب علموں کی قدرتی صلاحیتوں کو فروغ دینے اور اجاگر کرنے کا موقع فراہم کرے گی۔ نذیر حسین یونیورسٹی میں اس بات پر خصوصی توجہ رکھی جائے گی کہ تعلیم کے ذریعے خواتین کو مضبوط اور بااختیار بنایا جائے۔ انہوں نے کہاکہ آج نذیر حسین یونیورسٹی میں جن فیکلٹیزکا افتتاح کیا جارہا ہے ان میں فن تعمیرات اورماحولیات ،انجینئرنگ ،بزنس اینڈایڈمنسٹریشن کی فیکلٹیزشامل ہیں جبکہ مستقبل میں یونیورسٹی میں مزید فیکلٹیز قائم کی جائیں گی۔ جناب الطاف حسین نے مخیر حضرات سے اپیل کی کہ وہ اس یونیورسٹی میں فنڈلگائیں اوراپنے نام کی فیکلٹی قائم کریں اورعلم کے فروغ کے لئے اپناکرداراداکریں۔انہوں نے کہاکہ نذیرحسین یونیورسٹی علم کے فروغ کی بہترین مثال اوردوسروں کے لئے قابل تقلیدہے۔ انہوں نے طلبہ وطالبات سے کہاکہ نذیرحسین یونیورسٹی میں طلبہ وطالبات کے لئے مواقع ہیں کہ وہ علم ،تحقیق، سائنسی، ثقافتی اور سماجی سرگرمیوں میں خود کو شامل کریں۔ جناب الطاف حسین نے نذیرحسین یونیورسٹی کے افتتاح کے موقع پر اس یونیورسٹی کے چانسلر سیدطارق میر، نذیرحسین یونیورسٹی کے وائس چانسلر پروفیسر ڈاکٹرنسیم خان اوریونیورسٹی بورڈآف گورنرکے ارکان ، یونیورسٹی کے تمام پروفیسرز، لیکچررز،منتظمین کومبارکباد پیش کی اورافتتاحی تقریب کیلئے انتظامات کرنے پر رابطہ کمیٹی کے ارکان،رؤف صدیقی سمیت تمام ارکان پارلیمنٹ اور پوری ٹیم کوشاباش پیش کی۔