تحفظ پاکستان بل 2014ء کی مخالفت کے حوالہ سے ایم کیوایم کے اپوزیشن جماعتوں سے رابطے شروع

لندن۔۔۔11،اپریل2014ء

پاکستان کے ایوان بالا سینیٹ میں تحفظ پاکستان بل 2014ء کی مخالفت کے حوالہ سے ایم کیوایم نے اپوزیشن جماعتوں سے رابطوں کا سلسلہ شروع کردیا ہے ۔ اس سلسلے میں سینیٹ میں ایم کیوایم کے پارلیمانی لیڈربابرخان غوری نے سینیٹ کے اپوزیشن لیڈر سینیٹر اعتزاز احسن ، عوامی نیشنل پارٹی کے پارلیمانی لیڈر حاجی عدیل اور مسلم لیگ (ق) سے تعلق رکھنے والے سینیٹر کامل علی آغا سے ٹیلی فون پر رابطہ کیا اور قومی اسمبلی میں حکومت کی جانب سے منظور کیے گئے تحفظ پاکستان بل کے حوالہ سے تبادلہ خیال کیا ۔سینیٹر بابر غوری نے کہاکہ پاکستان پروٹیکشن بل 2014ء آمرانہ ،ڈریکونین، غیرانسانی، خون آشام ، شیطانی اوربے رحم قانون ہے۔ ایم کیوایم اس ظالمانہ قانون کے خلاف ہرسطح پر احتجاج کرے گی۔ سینیٹر اعتزاز احسن، سینیٹر حاجی عدیل اور سینیٹر کامل علی آغا نے ایم کیوایم کے مؤقف سے اتفاق کرتے ہوئے کہا کہ تحفظ پاکستان بل 2014ء کی سینیٹ میں بھرپورمخالفت کی جائے گی اور اس بل کو کسی بھی صورت میں منظور ہونے نہیں دیا جائے گا۔ چاروں جماعتوں کے رہنماؤں نے تحفظ پاکستان بل 2014ء کو بنیادی انسانی حقوق کی خلاف ورزی قراردیتے ہوئے اس بل کے خلاف سینیٹ میں مشترکہ لائحہ عمل تیارکرنے پر اتفاق کیا۔