حیدرآباد میں پی آئی اے سیلزآفس کی بندش پر ایم کیو ایم رابطہ کمیٹی کا اظہار تشویش

کراچی ۔۔۔۔10اپریل 2014ء

متحدہ قومی موومنٹ کی رابطہ کمیٹی نے کہا ہے کہ حیدر آباد میں پی آئی اے کے سیلز آفس کی ممکنہ بندش سے عوام کی مشکلات میں اضافہ ہو گا۔ایک بیان میں رابطہ کمیٹی نے کہا کہ دنیا بھر کے ممالک اپنے شہریوں کو آمد و رفت کی جدید تر سہولیات فراہم کرنے میں کوشاں رہے ہیں اور بد قسمتی سے ہما رے ملک میں عوام کو پتھروں کے دور میں دکھیلا جا رہا ہے ۔رابطہ کمیٹی نے کہا کہ حیدر آباد صوبہ سندھ کا دوسرا بڑا شہر ہے جو سندھ اور ملک کی معیشت میں زر مبادلہ کے ذخائر کے اٖضافے میں اہم کردار ادا کرتاہے ۔رابطہ کمیٹی نے تشویش کا اظہار کرتے ہوئے کہا کہ حیدر آ با د میں پہلے ہی بہتر ہوائی سفری سہولیات کا فقدا ن ہے اور اس پر ستم ضریفی ہے کہ وہاں پی آئی اے کے سیلز آفس کو بند کرنے کی کوششیں کی جارہی ہیں ۔رابطہ کمیٹی نے کہا کہ حیدر آباد کے منتخب حق پرست نمائندے متعدد بار ملک کے اعلیٰ ایوانوں میں حیدر آباد ائر پورٹ کی بندش کے حوالے سے بھی آواز بلند کرتے آئے ہیں لیکن تاحا ل ارباب اختیا ر کی جانب سے اس حوالے سے کسی قسم کے مثبت اقدامات نہیں کئے گئے ہیں ۔ اپنے بیان میں ایم کیو ایم رابطہ کمیٹی نے وفاقی حکومت ، ارباب اختیار اور پی آئی اے انتظامیہ سے مطالبہ کیا ہے کہ وہ حیدر آبا د میں بکنگ آفس کی بندش کے اپنے فیصلے پر نظر ثانی کریں اور حیدر آباد کی عوام کو ہوائی سفری سہولیات مہیا کرنے میں اپنا کردار اداد کریں تاکہ حیدر آبا د کے شہری جس پریشانی میں مبتلا ہیں اس کا فی الفور ازالہ کیا جائے ۔