ایم کیوایم کے قائد الطاف حسین کی سیفما کے چیئرمین اور ممتاز صحافی امتیاز عالم سے فون پر گفتگو

اس وقت پاکستان کو دہشت گردی کے جس عفریت کا سامنا ہے اس میں تمام اعتدال پسندوں کو اتحاد کا مظاہرہ کرنا چاہیے۔ امتیاز عالم

لندن ۔۔5اپریل 2014ء

متحدہ قومی موومنٹ کے قائد جناب الطاف حسین نے ساؤتھ ایشیا فری میڈیاایسوسی ایشن(سیفما) کے چیئرمین اورممتازصحافی امتیاز عالم کوبعض انتہا پسند دہشت عناصرکی جانب سے دی جانیوالی قتل کی دھمکیوں کی شدید مذمت کی ہے ۔ جناب الطاف حسین نے امتیازعالم کو فون کرکے ان سے دلی ہمدردی اور تشویش کا اظہار کیا۔ امتیازعالم سے گفتگو کرتے ہوئے جناب الطاف حسین نے کہا کہ تمام صحافتی تنظیموں، صحافیوں، قلمکاروں خصوصاً پروگریسو اور روشن خیال لکھاریوں کو ان دھمکیوں کا نوٹس لینا چاہیے اور اس دہشت گردی کے خلاف میدان عمل میں آنا چاہیے۔ انہوں نے حکومت سے بھی مطالبہ کیاکہ امتیازعالم کودھمکیاں دینے والے عناصر کے خلاف کارروائی کی جائے۔ جناب الطاف حسین نے امتیازعالم سے بھرپوریکجہتی اور ہمدردی کا اظہارکیا اوراس سلسلے میں اپنے مکمل تعاون کا یقین دلایا۔ امتیاز عالم نے فون کرنے اور ہمدردی اوریکجہتی کااظہارکرنے پر جناب الطاف حسین کا شکریہ ادا کیا اوراس بات سے اتفاق کیا کہ تمام صحافیوں کوکسی ایک صحافی پر حملے کواپنے اوپرحملہ تصورکرناچاہیے اوراس قسم کے واقعات پر متحدہوکراحتجاج کرناچاہیے۔انہوں نے جناب الطاف حسین کی اس بات سے بھی مکمل اتفاق کیاکہ اس وقت پاکستان کو دہشت گردی کے جس عفریت کاسامناہے اس میں تمام اعتدال پسندوں کو چاہیے کہ وہ اتحاد کا مظاہرہ کریں۔