ایم کیوایم انٹرنیشنل سیکریٹریٹ لندن میں حق پرست شہداء کے ایصال ثواب کیلئے فاتحہ خوانی

لندن۔۔۔29، مارچ2014ء

ایم کیوایم انٹرنیشنل سیکریٹریٹ لندن میں سرجانی ٹاؤن سیکٹر کے کارکن انورملک شہیدسمیت تمام حق پرست شہداء کے ایصال ثواب کیلئے فاتحہ خوانی کی گئی ۔ فاتحہ خوانی میں ایم کیوایم کے قائد جناب الطاف حسین نے خصوصی طورپرشرکت کی ۔ اس موقع پر پاکستان سے آئے ہوئے رابطہ کمیٹی کے ارکان ، حق پرست ارکان اسمبلی ، ایم کیوایم رابطہ کمیٹی لندن کے ارکان ، شعبہ ء خواتین کی اراکین اور انٹرنیشنل سیکریٹریٹ کے ارکان بھی موجود تھے ۔ رابطہ کمیٹی کے رکن عبدالحسیب نے حق پرست شہداء کے ایصال ثواب کیلئے فاتحہ خوانی کرائی ۔ بعدازاں پاکستان کی سلامتی وبقاء ، ترقی وخوشحالی، ایم کیوایم کے خلاف سازشوں کے خاتمے ، حق پرستانہ جدوجہد کی کامیابی، حق پرست شہداء کے بلند درجات ، شہداء کے لواحقین کیلئے صبرجمیل، لاپتہ کارکنان کی بازیابی، اسیرکارکنان کی رہائی اورسابق صدرپاکستان جنرل (ر) پرویز مشرف کی والدہ محترمہ کی صحت یابی کے علاوہ قائد تحریک جناب الطاف حسین کی درازی عمر اور صحت وتندرستی کیلئے خصوصی دعائیں کی گئیں۔ 

دریں اثناء متحدہ قومی موومنٹ کے قائد جناب الطاف حسین نے مسلح دہشت گردوں کے ہاتھوں ایم کیوایم سرجانی ٹاؤن سیکٹر کے کارکن انورملک اوراورنگی ٹاؤن میں ایم کیوایم کے کارکن مظہر علی کے سفاکانہ قتل کی سخت ترین الفاظ میں مذمت کرتے ہوئے حکومت سے مطالبہ کیا کہ انورملک اور مظہر علی کے قاتلوں کو گرفتارکرکے سخت ترین سزا دی جائے ۔ جناب الطاف حسین نے انورملک شہید اور مظہر علی شہید کے سوگوارلواحقین سے دلی تعزیت کااظہار کرتے ہوئے کہاکہ دکھ کی اس گھڑی میں مجھ سمیت ایم کیوایم کے تمام کارکنان آپ کے غم میں برابر کے شریک ہیں۔