قمر منصور کی بھابھی کے انتقال پر ایم کیوایم کے قائد جناب الطاف حسین کا اظہار تعزیت
مجھ سمیت ایم کیوایم کے تمام ذمہ داران وکارکنان قمر منصور اور ان کے اہل خانہ کے غم میں برابر کے شریک ہیں
محترمہ شمع مسعود گذشتہ کئی روز سے علیل تھیں اور مقامی اسپتال کے انتہائی نگہداشت کے وارڈ میں زیر علاج تھیں
لندن ۔۔25مارچ 2014ء
متحدہ قومی موومنٹ کے قائد جناب الطاف حسین نے ایم کیوایم شعبہ اطلاعات کے رکن اور سابق حق پرست صوبائی وزیر قمر منصور کی بھابھی محترمہ شمع مسعود کے انتقال پر گہرے دکھ اور رنج کا اظہار کیا ہے ۔اپنے تعزیتی بیان میں جناب الطاف حسین نے کہا کہ چند روز قبل ہی قمر منصور کے والد کا انتقال ہوا تھا اوراب ان کے خاندان کو ایک اور صدمہ کا سامنا کرنا پڑا ہے ۔ انہوں نے قمر منصور اور ان کے اہل خانہ سے دلی تعزیت کا اظہار کرتے ہوئے کہا میں اور ایم کیوایم کے تمام ذمہ داران وکارکنان ان کے غم میں برابر کے شریک ہیں اور دعا گو ہیں کہ اللہ تعالیٰ مرحومہ شمع مسعود کی مغفرت فرمائے ، انہیں اپنی جوار رحمت میں اعلیٰ مقام عطا کرے اور سوگوارلواحقین کو صبر جمیل کی توفیق دے ۔آمین
واضح رہے کہ محترمہ شمع مسعودگذشتہ کئی روز سے شدید علیل تھیں اور مقامی اسپتال کے انتہائی نگہد اشت کے وارڈ میں زیر علاج تھیں جہاں آج وہ خالق حقیقی سے جاملیں ۔