پشاور میں لیڈی ہیلتھ ورکر کا بہیمانہ قتل کھلی بربریت اور سفاکیت ہے ، الطاف حسین

لندن ۔۔24مارچ 2014ء 

متحدہ قومی موومنٹ کے قائد جناب الطاف حسین نے پشاور میں لیڈی ہیلتھ ورکرکے اغوا اور بہیمانہ قتل کی شدید الفا ظ میں مذمت کی ہے اور اس واقعہ کو کھلی بربر یت اورسفاکیت قرار دیا ہے ۔ اپنے ایک بیان میں جناب الطاف حسین نے کہا کہ طالبان اس سے قبل بھی پشاور ،کراچی اور مختلف شہروں میں کئی پولیو ورکرز کو اپنی دہشت گردی کا نشانہ بنا چکے ہیں جن میں خواتین پولیو ورکرز بھی شامل ہیں اور اب پشاور میں ایک اور خاتون پولیو ورکرکواغوا کرکے بدترین تشدد کا نشانہ بنا کر قتل کر دیا گیا۔ جناب الطاف حسین نے لیڈی ہیلتھ ورکرکے اغوا اور قتل کے واقعہ کی شدید مذمت کرتے ہوئے کہا کہ قوم کے معصوم بچوں کو پولیو او ردیگر بیماریوں سے بچا ؤ کے لئے علاقہ علاقہ جاکر بچوں کو ویکسین پلانے والی لیڈی ہیلتھ ورکرز در اصل جہاد کررہی ہیں اور جوسفاک اور درندہ صفت عناصران لیڈی ہیلتھ ورکرز کو اپنی دہشت گردی کانشانہ بنا رہے ہیں وہ انسانیت کے کھلے دشمن ہیں ۔ جناب الطاف حسین نے کہا جنگ بندی کے اعلان کے باوجود طالبان کی جانب سے پولیوورکرز کے قتل اور دہشت گردی کی دیگر کارروائیاں بدستور جاری ہیں ، لہٰذا وفاقی حکوت کو اس کا نوٹس لینا چاہئے ۔جناب الطاف حسین نے وزیر اعظم میاں محمد نوازشریف ،وفاقی وزیر داخلہ چوہدری نثار علی خان اور وفاقی اور خیبر پختونخوا حکومت سے مطالبہ کیا ہے کہ پشاورمیں لیڈی ہیلتھ ورکرز کے اغوا اور سفاکانہ قتل میں ملوث سفاک دہشت گردوں کو گرفتار کیا جائے اور لیڈی ہیلتھ ورکرز کو تحفظ فراہم کیا جائے۔