ایم کیوایم ،قرار داد پاکستان کے مطابق ملک وقوم کوفرسودہ جاگیردارانہ نظام سے نجات دلاناچاہتی ہے،الطاف حسین

لندن۔۔۔22، مارچ2014ء 

متحدہ قومی موومنٹ کے قائد جناب الطاف حسین نے پاکستان سمیت دنیا بھر میں مقیم پاکستانیوں کو ’’یوم قرار داد پاکستان ‘‘ کی دلی مبارکباد پیش کرتے ہوئے کہاہے کہ ایم کیوایم، قرار داد پاکستان کے مطابق ملک و قوم کوفرسودہ جاگیردارانہ نظام سے نجات دلانا چاہتی ہے اورپاکستان میں صحیح معنوں میں عوامی جمہوریت کے قیام کیلئے عملی جدوجہد کررہی ہے ۔ 

23مارچ یوم قرار داد پاکستان کے موقع پر ایک بیان میں جناب الطاف حسین نے کہا کہ آزادی ایک بڑی نعمت ہے اور زندہ قومیں اپنی آزادی کی نہ صرف قدر کرتی ہیں بلکہ اس کا نظریاتی اور فکری بنیادپرتحفظ بھی کرتی ہیں ۔جناب الطاف حسین نے کہاکہ وقت کا تقاضا ہے کہ ملک میں قومی یکجہتی ، مذہبی رواداری ، فرقہ وارانہ ہم آہنگی اور بھائی چارے کی فضا کو پروان چڑھایاجائے ۔