ابراہیم حیدری میں اسکول کی چھت سے توازن کھو کر نوجوان کے گرنے کے حادثہ میں طالب بچی مصباح کے جاں بحق اور طالب علم بچے محمد احمد کے زخمی ہونے پر حق پرست رکن سندھ اسمبلی وقار شاہ کا اظہار تعزیت
حادثہ غفلت اور لاپروائی سے رونما ہوا ہے اور اسکول کی عمارت کے نزدیک سے الیکٹرک پول کے کنڈوں کا گزرنا اس المناک حادثہ کا سبب ہے ، سید وقار شاہ
جاں بحق بچی کے لواحقین کو کے ای ایس سی معاوضہ ادا کرے اور زخمی بچے کے علاج و معالجہ کے اخراجات اٹھائے ، سید وقار شاہ کا مطالبہ
کراچی ۔۔۔21، مارچ2014ء
متحدہ قومی موومنٹ کے رکن سندھ اسمبلی سیدوقار شاہ نے ابراہیم حیدری کے علی اکبر شاہ گوٹھ میں واقع پرائیویٹ اسکول کی عمارت کے ساتھ گزرنے والے الیکٹرک پول کے کنڈے ہٹاتے ہوئے اپنا توازن کھو کرنوجوان کے اسکول کی چھت سے کمرے میں گرنے کے حادثہ اور اس کے نتیجے میں ایک بچی مصباح کے جاں بحق اور طالب علم بچے محمد احمد کے زخمی ہونے پر گہرے دکھ اور افسوس کااظہار کیا ہے ۔ ایک بیان میں انہوں نے کہاکہ یہ افسوسناک حادثہ غفلت اور لاپروائی سے رونما ہوا ہے اور اسکول کی عمارت کے نزدیک سے الیکٹرک پول کے کنڈوں کا گزرنا اس المناک حادثہ کا سبب ہے ۔انہوں نے کے ای ایس سی سے مطالبہ کیا کہ حادثہ میں جاں بحق ہونیوالی بچی کے لواحقین کو معاوضہ دیاجائے اور زخمی طالب علم بچے محمد علی کے علاج و معالجہ کے اخراجات برداشت کرے ۔ سید وقار شاہ نے حادثہ میں میں جاں بحق ہونے والی طالب علم بچی مصباح کے سوگوار لواحقین سے دلی تعزیت وہمدردی کااظہا رکرتے ہوئے دعا کی کہ اللہ تعالیٰ مرحومہ کو جنت الفردو س میں اعلیٰ مقام عطا فرمائے ، سوگواران کو صبرجمیل عطا کرے اور زخمی طالب علم بچے محمد احمد کو جلد و مکمل صحتیابی عطا فرمائے ۔