جسقم رہنماؤں کو گاڑی سمیت جلانے کے سفاکانہ واقعہ پر رابطہ کمیٹی کے ارکان ڈاکٹر فاروق ستار اور اشفاق منگی کے جئے سندھ قومی محاذ کے رہنماؤں سے ٹیلی فون پر رابطے

کراچی ۔۔۔21، مارچ2014ء 

متحدہ قومی موومنٹ کی رابطہ کمیٹی کے رکن اور قومی اسمبلی میں ایم کیوایم کے پارلیمانی لیڈر ڈاکٹر فاروق ستاراور رابطہ کمیٹی کے رکن اشفاق منگی نے جئے سندھ قومی محاذ کے سابق چیئرمین بشیر خان قریشی مرحوم کے بھائی مقصود قریشی اور ان کے ساتھی سلمان ودھو کو گاڑی سمیت زندہ جلا کر قتل کرنے کے سفاکانہ واقعہ پر جسقم کے مرکزی رہنماؤں سے ٹیلی فون پر رابطہ کیا اور بہیمانہ قتل کے واقعہ کی سخت ترین الفاظ میں مذمت کی ۔ ڈاکٹرفاروق ستار نے جئے سندھ قومی محاذ کے چیئرمین صنعان قریشی ، وائس چیئرمین ڈاکٹر نیاز کالانی ، مرکزی ذمہ داران ڈاکٹر آصف بالادی ،عبد الواحد آریسر اورڈاکٹر میر عالم مری سے علیحدہ علیحدہ ٹیلی فون پر بات کی اور جسقم رہنماؤں کے سفاکانہ قتل کی واردات پر گہرے دکھ اور افسوس کااظہا رکیا ۔ ڈاکٹر فاروق ستار اور اشفاق منگی نے جسقم رہنماؤں سے ٹیلی فون پر بات چیت کرتے ہوئے کہا کہ جسقم رہنماؤں کے بہیمانہ قتل کی واردات ظلم اور سفاکیت کی ایک اور مثال ہے اور اس میں جو درندہ صفت عناصر ملوث ہیں وہ سندھ میں یکجہتی کی فضا ء کو سبوتاژ کرنا چاہتے ہیں ۔انہوں نے کہا کہ سندھ کی تحریک سے وابستہ اور سندھ دھرتی سے پیار کرنے والوں کے بہیمانہ قتل کا سلسلہ نہ صرف تشویشناک ہے بلکہ ملک بھر کے محب وطن ، انسانیت اور قانون پسند حلقوں کیلئے لمحہ فکریہ ہے ۔ ڈاکٹر فاروق ستار اور اشفاق منگی نے جسقم رہنماؤں سے مقصود قریشی اور ان کے ساتھ سلمان ودھو کے بہیمانہ قتل پر دلی تعزیت وہمدردی کااظہار کیا اور کہا کہ دکھ کی اس گھڑ ی میں قائد تحریک جناب الطاف حسین سمیت ایم کیوایم کے تمام کارکنان آپ کے غم میں برابر کے شریک ہیں ۔ انہوں نے دعا کی کہ اللہ تعالیٰ مقتولین کو اپنی جواررحمت میں اعلیٰ مقام عطا فرمائے اور سوگواران کو یہ صدمہ برداشت کرنے کا حوصلہ عطاکرے ۔ (آمین)