جئے سندھ قومی محاذ کے سابق چیئرمین بشیر قریشی مرحوم کے بھائی اور جسقم کے مرکزی رہنما مقصود قریشی اور سلمان دودو کی بھریا روڈ سے جلی ہوئی گاڑی سمیت جھلسی ہوئی لاشیں ملنے کے واقعہ پر ایم کیوایم رابطہ کمیٹی کا اظہار مذمت

کراچی ۔۔۔21، مارچ2014ء 

متحدہ قومی موومنٹ کی رابطہ کمیٹی نے جئے سندھ قومی محاذ کے سابق چیئرمین بشیر قریشی مرحوم کے بھائی اور جسقم کے مرکزی رہنما مقصود قریشی اور سلمان دودو کی نوابشاہ بھریاروڈ سے جلی ہوئی گاڑی سمیت جھلسی ہوئی لاشیں ملنے کے واقعہ کی سخت ترین الفاظ میں مذمت کی ہے اور بہیمانہ قتل کی اس واردات کو سندھ کا امن خراب کرنے کی گھناؤنی ساز ش قرار دیا ہے ۔ ایک بیان میں رابطہ کمیٹی نے وفاقی اور صوبائی حکومت سندھ سے مطالبہ کیا کہ جسقم کے رہنما مقصود قریشی اور سلمان دودو کی جلی ہوئی گاڑی سمیت جھلسی ہوئی مسخ شدہ لاشیں ملنے کے واقعہ کی فی الفور اعلیٰ سطحی تحقیقات کرائی جائے اور بہیمانہ قتل کی اس واردات میں ملوث عناصر کو گرفتار کرکے کڑی سے کڑی سزا دی جائے۔ رابطہ کمیٹی نے مقصود قریشی اور سلمان دودو کے بہیمانہ قتل پر مقتولین کے سوگوار لواحقین سمیت جسقم کے تمام رہنماؤں اور کارکنوں سے دلی تعزیت وہمدردی کااظہار کرتے ہوئے انہیں صبر تلقین کی اور ددعا کی کہ اللہ تعالیٰ مقتولین کو جنت الفردوس میں اعلیٰ مقام عطا فرمائے اور سوگواران کو یہ صدمہ برداشت کرنے کا حوصلہ عطاکرے ۔ (آمین)