ایم کیوایم کی جانب سے سندھ میں حلقہ بندیوں کے حوالے سے سپریم کورٹ کے فیصلے کا زبردست خیر مقدم
سپریم کورٹ کے فیصلے نے من مانی حلقہ بندیوں کے حوالے سے ایم کیوایم کے مؤقف کی سچائی کو ثابت کردیا ہے
حلقہ بندیوں کے بارے میں سپریم کورٹ کا تاریخ ساز فیصلہ آئین و قانون اور سندھ کے مظلوم عوام کی فتح ہے۔ رابطہ کمیٹی
سپریم کورٹ کے فیصلے کی روشنی میں الیکشن کمیشن کے ذریعے فی الفور نئی حلقہ بندیاں کرائی جائیں
جلد از جلد قانون سازی کرکے بلدیاتی انتخابات کا انعقاد جلد از جلد کرایا جائے
کراچی:20؍ مارچ 2014ء
متحدہ قومی موومنٹ کی رابطہ کمیٹی نے سندھ میں حلقہ بندیوں کے حوالے سے سپریم کورٹ کے فیصلے کا زبردست خیر مقدم کیا ہے ۔ایک بیان میں رابطہ کمیٹی نے کہا کہ سپریم کورٹ کے فیصلے نے من مانی حلقہ بندیوں کے حوالے سے ایم کیو ایم کے مؤقف کی سچائی کو ثابت کردیا ہے، یہ تاریخ ساز فیصلہ آئین و قانون اور سندھ کے مظلوم عوام کی فتح ہے۔ رابطہ کمیٹی نے کہا کہ یہ تاریخ ساز فیصلہ جمہوریت کیلئے نیک شگون ہے اوریہ جمہوریت کے ثمرات نچلی سطح تک عوام کو پہنچانے میں اہم سنگ میل ثابت ہوگا ۔رابطہ کمیٹی نے تاریخ ساز فیصلہ دینے پر چیف جسٹس سپریم کورٹ سمیت تمام جج صاحبان کو زبردست خراج تحسین پیش کیا۔ رابطہ کمیٹی نے وفاقی اور صوبائی حکومتوں سے مطالبہ کیا کہ سپریم کورٹ کے فیصلے کی روشنی میں الیکشن کمیشن کے ذریعے فی الفور نئی حلقہ بندیاں کرائی جائیں اور جلدازجلدقانون سازی کرکے بلدیاتی انتخابات کا انعقاد جلد از جلد کرایا جائے ، تاکہ عوام کو نچلی سطح تک وسائل اور اختیارات کی منتقلی کا عمل بنایا جاسکے ۔